کراچی(اے این این )ایشیائی ترقیاتی بینک نے پاکستان کو 2 ارب 30 کروڑ ڈالر قرضہ دینے کا اعلان کر دیا۔ ملنے والی رقم سے توانائی، کیپٹیل مارکیٹ اور مقابلے کی فضا قائم کرنے سے مقامی صنعتوں کی پیداواری صلاحیت بڑھے گی۔معیشت کی بحالی اور روز گار کے مواقع پیدا کرنے کی خاطر ایشیائی ترقیاتی بینک پاکستان کو آئندہ تین سال میں 2 ارب 30 کروڑ ڈالر قرض فراہم کرے گا، یہ رقم توانائی کے منصوبوں، کیپٹل مارکیٹ کی بہتری اور ملک میں مقابلے کی فضا قائم کرنے کے لئے خرچ کی جائے گی۔
ایشیائی ترقیاتی بینک کے جاری اعلامیے کے مطابق پاکستان کو یہ رقم سال 2019 سے 2021 کے درمیان فراہم کی جائے گی، اے ڈی بی نے کہا ہے کہ صنعتوں کی پیداواری صلاحیت بڑھنے سے تجارتی خسارہ کم ہو گا۔معاشی تجزیہ کاروں کے مطابق ایشیائی ترقیاتی بینک کی جانب سے توانائی، کیپٹیل مارکیٹ اور مقابلے کی فضا قائم کرنے کے لئے رقم فراہم کرنے سے مقامی صنعتوں کی پیداواری صلاحیت بڑھے گی جس سے درآمدی اشیا پر انحصار کم ہوگا اور روزگار کے نئے مواقع بھی پیدا ہونگے۔
