اسلام آباد (مانیٹرنگ ڈیسک) ایف پی سی سی آئی کے قائم مقام صدر کریم عزیز ملک کا کہنا ہے کہ روپے کی قدر کو مستحکم کرنے کے لیے سفارشات پیش کریں گے۔ ان خیالات کا اظہار انہوں نے اپنے ایک بیان میں کیا، کریم عزیز کا کہنا تھا کہ کاروباری برادری کا ایک حصہ حکومت کی اقتصادی سمت کے بارے میں تذبذب کا شکار ہے۔ انہوں نے کہا کہ اس تذبذب کی وجہ سے بے چینی اور عدم استحکام کو ہوا مل رہی ہے، حکومت کے اہم عہدیداروں کے مابین رابطے کا فقدان کی خبروں پر تاجروں اور صنعتکاروں
کو تشویش ہے۔ ان کا کہنا تھا کہ روپے کی قدر میں کمی سے نہ صرف درامدات جو برامدات سے دگنی سے زیادہ ہیں مہنگی ہو گئی ہیں بلکہ برامدات کے لیے آنے والا خام مال بھی مہنگا ہوگیا ہے۔ ایف پی سی سی آئی کے قائم مقام صدر کا کہنا تھا کہ تقریباً ہر چیز کی قیمت بڑھ رہی ہے، روپے کی قدر کو مستحکم کرنا سٹیٹ بینک کے بس کا روگ نہیں ہے۔ ان کا مزید کہنا تھا کہ زرمبادلہ کے ذخائر مسلسل کم ہوکر ڈیڑھ مہینے کی درامدات کے برابر رہ گئے ہیں اور مارکیٹ میں ڈالر کی طلب بڑھ رہی ہے۔
