کراچی(مانیٹرنگ ڈیسک) صوبے بھر میں گیس کی بندش کے 4 روز گزرنے کے بعد پانچویں روز آئندہ 12 گھنٹے میں سی این جی اسٹیشن کھلنے اور بحران ختم ہونے کا امکان پیدا ہوگیا ہے۔ تفصیلات کے مطابق کئی دن کی اذیت ناک صورتحال کے بعد بالآخر کراچی سمیت سندھ بھر میں
آئندہ 12 گھنٹے میں سی این جی اسٹیشن کھلنے کا امکان پیدا ہوگیا ہے۔ چیئرمین سی این جی ایسوسی ایشن شبیر سلیمان کا کہنا ہے کہ پریشر بہتر ہونے پر سی این جی اسٹیشنز کھولنے کی یقین دہانی کروائی گئی ہے۔ انہوں نے کہا کہ گیس کے سسٹم میں پریشر کافی بہتر ہوگیا ہے۔ گمبٹ اور کنڑ تساقی گیس فیلڈ سے گیس کی فراہمی میں بہتری آگئی۔ دوسری جانب سوئی سدرن گیس کے ترجمان کا کہنا ہے کہ گیس پریشر میں بہتری آرہی ہے، بہتری رہی تو سی این جی اسٹیشنوں کو گیس کی ترسیل بحال کردی جائے گی۔ ترجمان کے مطابق سسٹم میں گیس آتے ہی حالیہ بحران ختم ہوجائے گا۔ واضح رہے کہ سوئی سدرن گیس کمپنی نے صوبے بھر میں سی این جی سیکٹر کو گیس کی فراہمی غیر معینہ مدت کے لیے بند کردی تھی۔ بعد ازاں گیس کا بحران مبینہ طور پر مصنوعی نکلا اور انکشاف ہوا کہ سندھ کی گیس پنجاب کو فراہم کی جارہی ہے۔ پی پی ایل کے ذرائع نے انکشاف کیا تھا کہ گمبٹ گیس فیلڈ میں کوئی خرابی نہیں ہے بلکہ گیس بحران کی اصل وجہ آر ایل این جی ٹرمینل میں خرابی ہے۔ دوسری طرف وزیر اعظم عمران خان نے گیس بحران کا نوٹس لیتے ہوئے سوئی ناردرن اور سدرن گیس کے بورڈز آف ڈائریکٹرز کو فوری طور پر ہٹانے کا فیصلہ کیا تھا۔ وزیر اعظم نے نااہلی کا مظاہرہ کرنے والوں کے خلاف سخت کارروائی کا حکم دیتے ہوئے فوری رپورٹ بھی طلب کرلی تھی۔
