لاہور( این این آئی)سابق چیئرمین پرائس کنٹرول کمیٹی میاں عثمان نے کہا ہے کہ تنخواہ دار طبقے کیلئے مہنگائی کے حساس اشاریوں میں مسلسل اضافہ ہو رہا ہے ، انتظامیہ کی پکڑ نہ ہونے کی وجہ سے گراں فروش ایک عام آدمی کے ماہانہ بجٹ میں 2سے 3ہزار روپے اضافے کا باعث بن رہے ہیں جو تشویش کا باعث ہے ۔ ان خیالات کا اظہارا نہوں نے صارفین کے حقوق کیلئے کام کرنے والی تنظیم کے نمائندہ وفد سے ملاقات میں گفتگو کرتے ہوئے کیا ۔ میاں عثمان نے کہا کہ حکومت کی جانب سے اشیائے خوردونوش
کی سرکاری نرخوں پر فروخت کو یقینی بنانے کیلئے کوئی میکنزم نہیں بنایا گیا جس کی وجہ سے گراں فروشوں کی جانب سے عوام کا استحصال کیا جارہا ہے ۔ اس کے علاوہ تنخواہ طبقے کیلئے مہنگائی کے حساس اشاریوں میں مسلسل اضافہ ہو رہا ہے جس کی وجہ سے گھریلو بجٹ بنانا مشکل ہوتا جارہا ہے ۔ انہوں نے کہا کہ حکومت ضرور ی اشیائے خوردونوش کی قیمتوں میں کمی کر کے ان کو منجمد کرے ۔ گراں فروشوں کے خلاف موثر مہم چلائی جائے اور گراں فروشی کرنے والوں کا ریکارڈ مرتب کیا جائے ۔
