کراچی(مانیٹرنگ ڈیسک) پاک سوزوکی پاکستان میں کلٹس کی جگہ سیلیریو متعارف کروا رہی ہے۔ سیلیریوں کی بڑی خصوصیت اس کی ایندھن بچانے کی صلاحیت ہے۔پاک سوزوکی موٹرزنے اکتوبر 2016 میں پاکستان سے کلٹس گاڑی ختم کرنے کا اعلان کرتے ہوئے کہا تھا کہ مارچ دو ہزار سترہ میں پاک سوزوکی موٹرکمپنی پاکستان میں کلٹس
کی جگہ ’’سیلیریو‘‘ متعارف کرائے گی جو 1000 سی سی ہو گی۔ سیلیریو چھوٹی گاڑی ہونے کے ساتھ ساتھ ایندھن بھی بچاتی ہے۔ہزار سی سی انجن کی طاقت رکھنے والی سیلیریو بھارت اورتھائی لینڈ میں متعارف کرائی جا چکی ہے۔ صارفین کی جانب سے اچھےرسپانس کے بعد اسے کلٹس کی جگہ پاکستان میں لانچ کیا جا رہا ہے۔ سیلیریو کی متوقع قیمت 12 لاکھ پانچ ہزار کے لگ بھگ ہوگی۔واضح رہے کہ پاک سوزوکی نے سوزوکی کلٹس گاڑی کی بکنگ یکم فروری سے بند کردی ہے۔پاک سوزوکی موٹرز کمپنی لمیٹڈ کے جنرل منیجرمارکیٹنگ کی جانب سے ڈیلرز کو جاری خط میں بتایا گیا تھا کہ کمپنی سوزوکی کلٹس کی بکنگ یکم فروری سے بند کررہی ہے۔ تاحال بک کیے گئے تمام آرڈرز پورے کیے جائیں گے لیکن سیلز ٹیم کلٹس کی مزید بکنگ نہ کرے۔کمپنی نے کلٹس کو سال دوہزار میں سوزوکی خیبر کے متبادل کے طور پر پیش کیا تھا۔ دوہزار سات تک اسے کاربونیٹر انجن اور پھر ’’ای ایف آئی‘‘ انجن کے ساتھ پیش کیا جانے لگا۔ پاکستان میں گذشتہ چند سال کےدوران کلٹس کی فروخت میں واضح کمی دیکھنے میں آئی۔کمپنی نے مہران آٹھ سو سی سی گاڑیوں کو بھی سوزوکی آلٹو 660 سی سی میں تبدیل کرنے کا فیصلہ کیا ہے۔ اکتوبر 2016 میں سینیٹ اسٹینڈنگ کمیٹی کے ارکان کو پاک
سوزوکی موٹر کمپنی لمیٹڈ کے پلانٹ کے دورے کے موقع پرکمپنی حکام کی جانب سے دی گئی بریفنگ میں مزید بتایا گیا تھا کہ کامیاب ترین ماڈل مہران 800 سی سی کو 2018 تک سوزوکی آلٹو 660 سی سی سے تبدیل کر دیا جائے گا۔پاک سوزوکی موٹرکمپنی کے حکام کا کہنا تھا کہ دو ہزارسترہ میں کمپنی درآمد شدہ سوزوکی گرینڈ وتارا ایس یو وی اور تیرہ سو سی سی سیڈن سیازبھی متعارف کرانے کا ارادہ رکھتی ہے۔
