لاہور ( این این آئی) فیڈرل بورڈ آف ریونیو نے ڈی ایچ اے سی این جی پرائیویٹ لمیٹڈ کے بنک اکاؤنٹس منجمد کردیئے، انکم ٹیکس کی عدم ادائیگی پر ڈی ایچ اے سی این جی کے اکاؤنٹ سے 49 لاکھ 22 ہزار روپے کی ریکوری کرلی گئی
۔ذرائع کے مطابق کارپوریٹ ریجنل ٹیکس آفس کی ٹیم نے کمشنران لینڈ ریونیو محمود حسین جعفری کی ہدایت پر کارروائی کرتے ہوئے وائے بلاک کمرشل ایریا فیز تھری میں قائم ڈی ایچ اے سی این جی پرائیویٹ لمیٹڈ کے بنک اکانٹس منجمد کردیئے۔
ایف بی آر کی ریکوری ٹیم میں ڈپٹی کمشنر ان لینڈ ریونیو علی احسن وڑائچ، انسپکٹر سید وقاص احمد اور ضیا الدین قریشی شامل تھے۔ایف بی آر حکام کے مطابق ڈی ایچ اے سی این جی کے ذمے سال 2009-10کے انکم ٹیکس کی مد میں رقم واجب الادا تھی، نوٹسز کے باوجود ادائیگی نہ کرنے پر اکاؤنٹس منجمد کرکے 49لاکھ 22ہزار روپے کی ریکوری کی گئی ہے۔
