اسلام آباد (این این آئی)ایشیائی ترقیاتی بینک پاکستان کو شورکوٹ تا خانیوال ایم فور موٹروے کی تعمیر کے لئے 10کروڑ ڈالر فراہم کرے گا۔ اس سلسلے میں حکومت پاکستان اور ایشیائی ترقیاتی بینک کے درمیان معاہدہ طے پا گیا ہے جس کے تحت شورکوٹ خانیوال موٹروے کے 64کلومیٹر حصہ کی تعمیر کے لئے 100ملین ڈالر کا قرضہ فراہم کیا جائے گا۔ وفاقی سیکرٹری اقتصادی امور ڈویژن طارق باجوہ اور ایشیائی ترقیاتی بینک کے کنٹری ڈائریکٹر برائے پاکستان ورنرلیپیک نے معاہدے پر دستخط کیے۔ وفاقی وزیر خزانہ سینیٹر اسحاق ڈار اور ایشیائی ترقیاتی بینک کے نائب صدر وینکئی ژانگ بھی اس موقع پر موجود تھے۔ ایشیائی ترقیاتی بینک کے نائب صدر نے اظہار خیال کرتے ہوئے کہا کہ پاکستان کو اپنی جغرافیائی حیثیت سے فائدہ اٹھانا چاہیے۔ وسط ایشیائی علاقائی اقتصادی تعاون کے پروگراموں کے ساتھ ساتھ علاقائی رابطے کے دیگر اقدامات پاکستان کو اقتصادی ترقی کی راہ پر گامزن کر سکتے ہیں۔ انہوں نے کہا کہ اس منصوبہ میں ایشیائی ترقیاتی بینک اور ایشیائی انفراسٹرکچر انویسٹمنٹ بینک کے درمیان پہلی کوفنانسنگ قائم کی گئی ہے۔ اے آئی آئی بی رواں ماہ بورڈ کی منظوری کے بعد 100ملین ڈالر فراہم کرے گا۔ علاوہ ازیں برطانیہ کے بین الاقوامی ترقی کے ادارہ ڈی ایف آئی ڈی نے بھی اس منصوبہ کے لئے 34ملین کی گرانٹ کا اعلان کیا ہے۔