اسلام آباد (این این آئی)اسلام آباد الیکٹرک سپلائی کمپنی(آئیسکو) کے ترجمان نے کہا ہے کہ آئیسکو کے زیر انتظام شہری علاقوں میں 6 ٗ دیہی علاقوں میں 8 گھنٹے کی لوڈ شیڈنگ کی جا رہی ہے، صارفین موسم گرما میں بجلی کے غیر ضروری استعمال سے گریز کریں۔ ایک بیان میں ترجمان نے کہا کہ پیرودھائی KTM 132KVلائن کی ری کنڈکٹنگ کی جارہی ہے تا کہ رمضان المبارک کی آمد سے قبل سسٹم کو اپ گریڈ کیا جا سکے ، جبکہ ریجن میں کچھ مقامات پہ شاہراوں کی کشادگی کے کام کے باعث کچھ مقامات پر الیکٹرک پولز کی شفٹنگ کی وجہ سے متعلقہ علاقوں کو بجلی کی فراہمی متاثر ہوتی ہے ۔ترجمان نے کہا کہ ناگزیرتعمیراتی کاموں کی وجہ سے بجلی بندش شیڈول کی باقاعدگی سے منظوری لی جاتی ہے جسکی تفصیلات تمام اخباروں میں روزانہ کی بنیادپر دی جاتی ہیں۔ موسم گرما میں بجلی کی طلب میں اضافہ ہونے کے باوجود آئیسکو نے لوڈ شیڈنگ کے اوقات میں کوئی اضافہ نہیں کیا اور جو لوڈمینجمنٹ پلان دسمبر 2015 سے نافذ ہے اسی پر اب بھی متواتر عمل درآمد کیا جا رہا ہے۔آئیسکو ترجمان نے بعض اخباروں میں آنے والی ان خبروں کی سختی سے تردید کی ہے جن میں کہا گیا ہے کہ شہروں میں 12سے 14 گھنٹے جبکہ دیہی علاقوں میں 14 سے18گھنٹے کی لوڈ شیڈنگ کی جارہی ہے۔ ترجمان کا کہنا ہے کہ دسمبر سے نافذ شدہ لوڈمینجمنٹ کے مطابق صرف شیڈول لوڈشیڈنگ کی جا رہی ہے ۔آئیسکو نے اپنے معزز صارفین سے اپیل کی ہے کہ موسم گرما میں بجلی کے غیر ضروری استعمال سے گریز کریں ، اپنے اے سی 26ڈگری پر چلائیں اور بجلی سے متعلقہ کسی بھی شکایات اور معلومات کے لئے آئیسکو کی نئی ایس ایم ایس سروس روشنی 8398پر ایس ایم ایس کریں۔