اسلام آباد (نیوز ڈیسک)پاکستان کے دوست ملک قطر نے پاکستان میں توانائی بحران کے خاتمے کے لئے دو نئے پاور پلانٹ تعمیر کرنے میں دلچسپی ظاہر کردی ہے۔ خلیج ٹائمز کے مطابق پاکستان میں قطری سفیر سقر بن مبارک المنصوری نے اسلام آباد چیمبر آف کامرس اینڈ انڈسٹری کے ارکان سے گفتگو کرتے ہوئے کہا کہ نئے پاور پلانٹ تعمیرکرنے کے لئے فزیبیلٹی سٹڈی کا کام شروع ہوچکا ہے۔ ان کا مزید کہنا تھا کہ قطری اور چینی کمپنیاں پاکستان میں پہلے ہی کوئلے سے چلنے والے چار پاور پلانٹس پر کام کررہی ہیں۔ قطری سفیر نے اس موقع پر توقع کا اظہار کیا کہ ان پاور پلانٹس کی تعمیر پاکستان کے توانائی کے مسائل کو حل کرنے میں انتہائی مددگار ثابت ہوگی۔ ایک اور اہم موضوع پر بات کرتے ہوئے انہوں نے کہا کہ قطر پاکستان سے مزید افرادی قوت منگوانے میں بھی دلچسپی رکھتا ہے۔ ان کا کہنا ہے کہ اس وقت قطر میں ایک لاکھ 12ہزار سے زائد پاکستانی خدمات سرانجام دے رہے ہیں جبکہ متعدد نئے پراجیکٹس پر کام کرنے کے لئے مزید افرادی قوت کی ضرورت ہے۔ انہوں نے امید ظاہر کی کہ ان پراجیکٹس کے لئے پاکستان سے مزید ملازمین منگوائے جائیں گے۔