لاہور(نیوزڈیسک) تحریک انصاف پنجاب نے ایک فیصد ٹیکس دے کر پانچ کروڑ تک کے کالے دھن کو سفید کرنے کی مجوزہ سکیم پرتشویش کا اظہار کرتے ہوئے کہا ہے کہ حکومت صرف اپنے خاص حواریوں کیلئے اتنا بڑ اقدام اٹھانے جارہی ہے ، ایک طرف عالمی مالیاتی اداروں سے کڑی شرائط پر بھاری قرضے لے کر ملک و قوم کو غلام بنایا جارہا ہے اور دوسری طرف خود ہی ایسے راستے دکھائے جارہے ہیںجو ثابت کرتا ہے کہ حکومت ٹیکس چوروں کی سرپرست ہے۔ تحریک انصاف پنجاب میڈیا ٹاسک فورس کے کنوینر جمشید اقبال چیمہ نے اپنے ایک بیان میں کہاہے کہ پاکستان میں ہر شعبے سے وابستہ افراد بالواسطہ اور بلاواسطہ بھاری ٹیکسز ادا کر رہے ہیں لیکن ایک طبقہ ایسا ہے جو ٹیکس ادا نہیں کرتا اور پھر اس کے لئے خصوصی سکیمیں متعارف کر ادی جاتی ہیں۔پاکستانی قوم ماچس کی ایک ڈبی کی خریداری پر بھی ٹیکس دے رہی ہے لیکن بد قسمتی سے اسے تعلیم، پینے کے صاف پانی اور صحت جیسی بنیادی سہولیات بھی میسر نہیں۔ انہوں نے کہا کہ تحریک انصاف اقتدار میں آکر عوام کےلئے ٹیکس کے نظام میں آسانیاں پیدا کرے گی اور عوام خود ٹیکس دیں گے ۔ عوام کے ٹیکس کا پیسہ موجودہ حکمرانوں کی طرح اپنے اللے تللوں پر خرچ کرنے کی بجائے ملک و قوم کی فلاح و بہبود پر خرچ کریں گے جس سے ملک میں خوشحالی اور عوام کی زندگیوں میں آسودگی آئے گی۔ جمشید اقبال چیمہ نے مزید کہا کہ حکومت کی پانچ کروڑ تک کے کالے دھن کو ایک فیصد ٹیکس دے کر سفید کرنے کی مجوزہ سکیم صرف اپنے خاص حواریوں کے لئے ہے جس سے قوم کو کوئی فائدہ نہیں ہوگا ۔حکومت ایسے چور راستے نکالنے کی بجائے شفافیت کو فروغ دے ۔