ملتان (نیوزڈیسک)ملتان میں میٹرو بس منصوبے کیخلاف شہریوں نے احتجاجی مظاہرہ کیا اور مشتعل مظاہرین نے میٹرو روٹ کے جنگلے توڑ دئیے۔اتوار کو یہاں ملتان کے علاقے مدنی چوک پر ہونے والے احتجاجی مظاہرے میں اہل علاقہ اور شہریوں کی بڑی تعداد نے شرکت کی اور میٹرو بس منصوبے کیخلاف احتجاج کیا، احتجاج کے دوران مشتعل مظاہرین نے میٹرو بس روٹ کے جنگلے توڑ دیئے اور منصوبے کیخلاف نعرے بازی کی۔ مظاہرین نے کہا کہ میٹرو بس منصوبے میں سڑکیں کشادہ نہیں کی گئیں، سروس روڈ نہیں بنایا گیا اور نہ ہی فلائی اوور کی تعمیر کی گئی جس سے اہل علاقہ اور شہریوں کو آمد و رفت میں پریشانی کا سامنا کرنا پڑے گا، مظاہرین نے مدنی چوک سے میٹرو بس منصوبہ ختم کرنے کا مطالبہ کیا اور ٹائر جلا کر روڈ بھی بلاک کر دیا۔ تاہم اے سی سٹی کجانب سے مسئلے کے حل کی یقین دہانی پر مظاہرین منتشر ہو گئے۔