راولپنڈی (نیوزڈیسک)تاجکستان میں پاکستان چھاگیا،وسطی ایشیائی منڈیوں میں پاکستانی مصنوعات متعارف کرانے کے لیے راولپنڈی چیمبر آف کامرس اینڈ انڈسٹری کے زیر اہتمام تاجکستان میں منعقدہ پہلی ”میڈ ان پاکستان “نمائش اختتام پذیر ہو گئی ۔نمائش میں پاکستانی مصنوعات کے سٹالز سجانے کے ساتھ ساتھ مقامی تاجروں کے ساتھ اہم تجارتی میٹنگز کا انعقاد بھی کیا گیا ۔میڈ ان پاکستان نمائش میں مقامی سرمایہ کاروں اور عوام نے گہری دلچسپی کا اظہار کیامیڈ ان پاکستان نمائش میں تاجکستان میں پاکستان کے سفیر طارق اقبال سومرو نے ہائی کمشنر کے ہمراہ بحیثیت چیف گیسٹ شرکت کی ۔نمائش کی اختتامی تقریب میں راولپنڈی چیمبر آف کامرس اینڈ انڈسٹری کے صدر میاں ھمایوں پرویز ،چیئرمین آر سی سی آئی نمائش کمیٹی چوہدری عبدالرﺅف ،وائس چیئرمین نمائش کمیٹی خورشید برلاس ،مسز رستموف منظورا،ڈپٹی چیئرمین تاجکستان چیمبر آف کامرس شریوو خوش بخت اور نیشنل بنک آف پاکستان کے ڈپٹی جنرل مینیجر کے علاوہ پاکستانی و تاجک بزنس کمیونٹی کی بڑیی تعداد نے شرکت کی ۔نمائش میں پینٹ ،فرنیچر ،آئی ٹی ،کچن ویئرز ،زراعت ،لیدر ،پولٹری ،فارماسوٹیکل ہینڈی کرافٹ اور سرجیکل آلات کے شعبہ جات سے منسلک 30پاکستانی کمپنیوں نے شرکت کی ۔اس موقع پر راولپنڈی چیمبر آف کامرس اور تاجکستان چیمبر آف کامرس کے مابین دو طرفہ تعاون کے فروغ کے لیے ایک مفاہمت کی یادداشت پر دستخط بھی ہوئے ۔ایم او یو کے تحت دونوں ممالک کے مابین تجارت کے فروغ کے لیے اقدامات اٹھائے جائیں گے ۔ راولپنڈی چیمبر آف کامرس اینڈ انڈسٹری کے صدر میاں ھمایوں پرویزنے میڈ ان پاکستان نمائش کو برآمدات کے حجم میں اضافے کا موجب قرار دیا اور کہا کہ اس طرح کی نمائشوں کے انعقاد سے تجارت کو فروغ ملے گا جس کا براہ راست فائدہ ملکی معیشت کو پہنچتا ہے اور راولپنڈی چیمبر ملکی معیشت کو مضبوط بنانے کے لیے اپنا کردار ادا کرتا رہے گا ۔