اسلام آباد(نیوزڈیسک)وفاقی وزیر پانی و بجلی خواجہ محمد آصف نے کہاہے کہ پاکستان میں پن بجلی کے ذرائع سے 30ہزار میگا واٹ سے زائد بجلی پیدا کی جاسکتی ہے لیکن اب تک ان وسائل سے استفادہ نہیں کیا جاسکا ۔وہ بدھ کو یہاں کورین ہائیڈرو اینڈ نیوکلیئر پاور کمپنی کے ایچ این پی کے وفد سے گفتگو کررہے تھے جس میں جنوبی کوریا کے سفیر ڈاکٹر سانگ جانگ ہوان کی سربراہی میں ان سے ملاقات کی ۔وفد نے بتایا کہ اس کمپنی کا پن بجلی اور نیوکلیئر بجلی گھروں کا طویل تجربہ ہے اور وہ پاکستان میں پن بجلی کے منصوبوں میں سرمایہ کاری میں گہری دلچسپی رکھتی ہیں ۔وزیر پانی وبجلی نے توانائی سمیت پاکستان میں ڈھانچہ جاتی شعبے میں کوریا کی حکومت کے تعاون کو سراہا اور کہاکہ کوریا کے تعاون سے ہم 102میگا واٹ کا گل پور ہائیڈرو پاور منصوبہ لگا رہے ہیں جس کا سنگ بنیاد حال ہی میں وزیر اعظم نے رکھا ہے ۔انہوںنے کہاکہ پاکستان میں پن بجلی کی پیداوار کے بڑے مواقع موجود ہیں جن سے استفادہ کر نے کی ضرورت ہے خواجہ آصف نے یقین دلایا کہ حکومت کوریائی کمپنیوں کو بھرپور تعاون فراہم کریگی انہوں نے اس موقع پر منیجنگ ڈائریکٹر پی پی آئی بی کو ہدایت کی کہ کورین کمپنیوں کو ہر ممکن سہولت فراہم کی جائے ۔ملاقات میں ایڈیشنل سیکرٹری حسن ناصر جامی بھی موجود تھے ۔