اسلام آباد(نیوزڈیسک) واپڈا اور چینی کمپنی کے ماہرین نے نندی پور پاور پلانٹ سے بجلی کی پیداوار بحال کر دی، پاور پلانٹ سے 230 میگاواٹ بجلی کی پیداوار کو یقینی بنا لیا گیا، ایک ماہ میں پیداوار کو 425 میگاواٹ تک لے جایا جائے گا، فرنس آئل کے پاور ٹریٹمنٹ پلانٹ کی صلاحیت نہ بڑھانے کی صورت میں پلانٹ سے بجلی کی پیداوار پھر کم جائے گی۔نجی ٹی وی نے باوثوق ذرائع کے حوالے سے بتایا کہ واپڈا کے ا نجینئر ز نے چینی کمپنی کے ساتھ مل کر نندی پور پاور پلانٹ کو آپریشنل کیا وزات پانی و بجلی کے ذرائع کے مطابق پلانٹ آزمائشی بنیاد پر دوبارہ چلا دیا گیا ہے اور ابتدائی طور پر پلانٹ کی 2 ٹربائنز چلائی گئی ہیں جن سے 230 میگاواٹ بجلی پیدا کی جا رہی ہے۔ ایک ماہ تک پاور پلانٹ کو مکمل طور پر فعال بنا دیا جائے گا ۔دوبارہ آغاز کے بعد پاور پلانٹ سے 230 میگاواٹ بجلی نیشنل گرڈ میں شامل کی جارہی ہے۔ ذرائع کے مطابق فرنس آئل کے پاور ٹریٹمنٹ پلانٹ کی صلاحیت کو نہ بڑھایا گیا تو پلانٹ سے بجلی کی پیداوار پھر کم جائے گی۔ نندی پور پاور پلانٹ کا رواں سال 31 مئی کو افتتاح کیا گیا تھا تاہم تکنیکی خرابیوں کے باعث پراجیکٹ کو بند کردیا گیا تھا۔مختلف حلقوں کی جانب سے دباو ¿ بڑھنے پر وزیر اعظم نواز شریف نے تقریباً 2 ہفتے قبل وفاقی کابینہ کی کمیٹی برائے توانائی کے اجلاس کے بعد پلانٹ کے مینیجنگ ڈائریکٹر ایم ڈی کیپٹن (ر) محمد محمود کے تبادلے کی ہدایت جاری کردی۔اجلاس میں وزارت پانی و بجلی کی جانب سے وزیر اعظم کو یہ یقین دہانی کرائی گئی تھی اگر بیرونی مداخلت کے بغیر پلانٹ کا مکمل کنٹرول وزارت کو دیا جاتا ہے تو وہ تین سے چار ہفتوں میں اسے آپریشنل کردے گی۔چند روز قبل شہزاد اکبر کی بطور پراجیکٹ ڈائریکٹر تقرری عمل میں آئی جبکہ وزیر اعظم کی جانب سے پلانٹ کا مکمل کنٹرول وزارت پانی و بجلی کو دیے جانے کے بعد وزارت نے پلانٹ کو دوبارہ آپریشنل کرنے کے لیے پاور جنریشن کمپنیوں کے انجینئرز کی خدمات حاصل کرنے کا فیصلہ کیا تھا۔