کراچی(نیوز ڈیسک) وفاق ایوان ہائے صنعت و تجارت نے وزیر اعظم کی جانب سے کسانوں کیلیے 341 ارب روپے کے ریلیف پیکیج کا خیرمقدم کرتے ہوئے اسے پیداواری لاگت میں کمی کیلیے بروقت فیصلہ قرار دیا ہے۔ایف پی سی سی آئی کے صدر میاں محمد ادریس نے ایک بیان میں پیکیج کو ہر قسم کی زرعی کماڈیٹی کاشت کرنے والے کسانوں کیلیے فائدہ مند قرار دیااور کہا کہ پیکیج میں چاول اور کپاس کی بلند پیداواری لاگت اور انٹرنیشنل مارکیٹ میں قیمت کی کمی سے کسانوں کو درپیش مسائل کو مدنظر رکھا گیا ہے۔
انہوں نے کہا کہ ریلیف پیکیج میں چاول کے ایکسپورٹرز کے قرضوں کی ادائیگی کی مہلت 30جون 2016تک بڑھادی گئی جس کا مطالبہ رائس ایکسپورٹرز ایسوسی ایشن نے 11ستمبر کو وزیر اعظم نواز شریف کے ساتھ ملاقات میں کیا تھا۔انہوں نے وزارت پٹرولیم وقدرتی وسائل پر زور دیا کہ ایران پاکستان گیس پائپ لائن منصوبے کو عملی جامہ پہنانے کیلیے کام کی رفتار تیز کی جائے۔انہوں نے برآمدات میں اضافے کیلیے بجلی گیس کی فراہمی کو ناگزیر قرار دیتے ہوئے دیہات کو بھی طویل لوڈشیڈنگ سے نجات دلانے کی ضرورت پر زور دیا۔