کراچی(نیوز ڈیسک) پی این ایس سی نے بینکوں سے لیے گئے قرضوں کامارک اپ ریٹ کم کراکے 1159ملین روپے بچانے میں کامیاب ہوگئی۔تفصیلات کے مطابق پاکستان نیشنل شپنگ کارپوریشن نے بینکوں سے حاصل کردہ 4ارب روپے کا مارک اپ ریٹ 13.05 فیصد سے کم کراکے 8.10 فیصدکرانے میں کامیاب ہوگئی۔ مارک اپ کی شرح میں کمی سے قومی خزانے کو 1159 ملین روپے کی بچت ہوئی۔ جاری بیان کے مطابق اس موقع کے لیے فیصل بینک، میزان بینک، یو بی ایل اور اسٹینڈرڈ چارٹرڈ بینک سے طویل مذاکرات کیے گئے جو کامیاب رہے۔ ان بینکوں نے پی این ایس سی کی مستحکم کاروباری حیثیت، اس کے مالی استحکام اور عمدہ مینجمنٹ کو پیش نظر رکھتے ہوئے اپنے اپنے مارک اپ کی شرح کم کردی۔ بینکوں کے اس اقدام کی بدولت قرضوں کی باقی ماندہ مدت کے دوران ان بینکوں سے لیے گئے قرضوں پر فنانشل کاسٹ میں کمی ہوگئی۔ فیصل بینک اور میزان بینک کے قرضوں پر فنانشل کاسٹ میں 302 ملین روپے کی بچت ہوئی۔یوبی ایل کے قرضوں پر 299ملین روپے بچت اور اسٹینڈرڈ چارٹرڈ بینک سے لیے گئے قرضوں پر فنانشل کاسٹ میں 119ملین روپے بچت ہوئی۔ جاری کردہ اعلامیے کے مطابق پی این ایس سی کے مختلف بینکوں سے لیے گئے تقریباً 4ارب روپے کے قرضوں پر بھاری مارک اپ کی ادائیگی کے باعث ان قرضوں کی فنانشل کاسٹ بہت بڑھ گئی تھی کیوں کہ ان پر مارک اپ کی شرح3MK+2.2% تھی۔ مارک اپ میں کمی کے لیے مختلف تدابیر اختیار کی گئیں تاہم چیئرمین پی این ایس سی نے بذات خود اس معاملے میں گہری دلچسپی لے کر بینکوں سے مذاکرات کی ہدایت دی۔ بینکوں سے تفصیلی بات چیت کے بعد پی این ایس سی اپنے قرضوں کی فنانشل کاسٹ میں ممکنہ حد تک کمی کرنے میں کامیاب ہوگئی۔