لاہور(نیوزڈیسک)پنجاب حکومت کے ہزاروں غریب خاندانوں کے گھروں کے چولہے بجھانے کیلئے آپریشن کا آغازکردیا،پنجاب حکومت نے بڑے شہروں میں چنگ چی رکشے پر پابندی کے حتمی فیصلے کے بعد لاہور سے آپریشن کا آغاز کر دیا ،175 سے زائد چنگ چی رکشے پکڑ کر کاغذات ضبط کر لئے گئے ۔حکومت پنجاب نے لاہور سمیت صوبے کے پانچ بڑے شہروں میں چنگ چی رکشے مرحلہ وار بند کرنے کا آغاز کر دیا ہے جس کے تحت لاہور میں 175سے زائد رکشا مالکان کے خلاف کارروائی کی گئی۔ لاہور ٹرانسپورٹ اتھارٹی کے حکام کے مطابق لاہور شہر میں 39 ہزار سے زائد چنگ چی رکشے چل رہے ہیں جن کو سپریم کورٹ کے ایک حکم کے تحت آلودگی پھیلانے پر بند کیا جا رہا ہے۔ اتھارٹی کے سیکرٹری چوہدری محمد اقبال نے بتایا کہ شاہدرہ کے علاقے میں 175 سے زائد رکشوں کی رجسٹرشن کتاب ضبط کر لی گئی ہے اور فی کس آٹھ سو روپے جرمانہ کیا گیا ہے۔ موٹر سائیکل کو غیر قانونی طور پر تبدیل کرکے رکشا بنایا گیا ہے۔ اس کو دوبارہ موٹر سائیکل بنانے پر ضبط شدہ کاغذات واپس کر دئیے جائیں گے۔ چوہدری اقبال کے مطابق لاہور سے مرحلہ وار رکشے ختم کرنے کا آغاز کر دیا گیا ہے اس کے بعد یہ آپریشن گوجرانوالہ، فیصل آباد، ملتان اور راولپنڈی میں بھی ہوگا۔ واضح رہے کہ پنجاب حکومت اس سلسلے میں سپریم کورٹ کے حکم کا تو سہارا لے رہی ہے مگر غریب چنگ چی ڈرائیوروں کو متبادل روزگاردینے کے لئے کوئی قابل ذکر اقدام نہیں کیاگیا اور نہ ہی کسی قسم کی داد رسی کی جارہی ہے