لاہور(نیوز ڈیسک) حکومت نے چپکے سے بجلی صارفین پرفنانشنل کاسٹ اورٹیرف سرچارج عائدکرکے وصولی بھی شروع کردی جس کے باعث صارفین رواں ماہ کے زائد بلوں پر حیران وپریشان ہو گئے۔ذرائع کا کہنا ہے کہ دو ماہ ڈیڈ اور یونیورسل سرچارج کی وصولی بھی کی گئی ہے جس سے بجلی بلوں میں نمایاں اضافہ ہوا ہے۔لیسکو ذرائع کے مطابق عید سے قبل نیپرا نے چپکے سے فنانشنل کاسٹ اور ٹیرف ریشنل سرچارج عائد کئے اور بجلی کی تقسیم کارکمپنیوں کوان کی وصولی کے لئے ہدایات جاری کیں۔ذرائع کا کہنا ہے کہ بجلی صارفین سے فنانشنل کاسٹ سرچارج (ایف سی ایس)کی مد میں 27پیسے فی یونٹ جبکہ ٹیرف ریشنل سرچارج کی مد میں1روپیہ 88پیسے فی یونٹ چارج کئے گئے ہیں۔پہلے سے عائد ڈیڈسرچارج 30پیسے فی یونٹ اور یونیورسل اوبیلگیڑی فنڈ کی مد میں ایک ہزار یونٹ یا اس سے زائد استعمال کرنے والے صارفین سے ایک روپیہ فی یونٹ اور کم پر 50پیسے فی یونٹ ٹیکس عائد کیا تھا جس کو عدالت میں چیلنج کیاگیا۔عدالت نے اس کو معطل کردیا تھا جس پر عدالت کے فیصلہ میں دونوں ٹیکسوں کی وصولی سے روک دیاگیا مگر دو ماہ ٹیکسوں کی وصولی کی اجازت دی گئی جو صارفین سے بلوں میں یکمشت کی جارہی ہے جس کی وجہ سے صارفین کے بلوں میں اضافہ ہوگیاہے۔