اسلام آباد (نیوز ڈیسک)بجٹ 2015-16ءکی تیاری کا کام آخری مراحل میں داخل ہوگیا ۔سالانہ ترقیاتی منصوبے کو حتمی شکل دینے کےلئے اجلاس 19مئی کو طلب کرلیا گیا ہے۔ذرائع کے مطابق سالانہ منصوبہ بندی رابطہ کمیٹی کا اجلاس وفاقی وزیر منصوبہ بندی وترقیات احسن اقبال کی صدارت میں اسلام آباد میں ہوگا۔ اجلاس میں رواں مالی سال کے میکرو اکنامک اشاریوں کی منظوری دی جائےگی اور آئندہ مالی سال کا ہدف مقرر کیا جائےگا۔ذرائع کے مطابق اجلاس میں وفاقی و صوبائی حکام شرکت کریں گے جس میں رواں مالی سال کے ترقیاتی پلان کا جائزہ لیا جائےگا جبکہ آئندہ مالی سال کے اہداف بھی مقرر کیے جائیں گے۔ اجلاس میں رواں مالی سال کے دوران زراعت، خدمات اور صنعتی ترقی کا جائزہ لےکر آئندہ مالی سال کے اہداف بھی مقرر کئے جائیں گے۔