اسلام آباد(این این آئی)اسلام آباد کی قائداعظم یونیورسٹی میں دو طلبہ تنظیموں میں تصادم کے نتیجے میں کئی افراد زخمی ہوگئے۔ انتظامیہ نے یونیورسٹی غیر معینہ مدت کیلئے بند کردی جبکہ طلبہ کو فوری طور پر ہاسٹل خالی کرنے کی ہدایت کردی گئی۔پولیس کے مطابق اسلام آباد کی قائد اعظم یونیورسٹی میں دو طلبہ تنظیموں میں ہاسٹل میں رہائش کے تنازع پر جھگڑا ہوا جو تصادم کی شکل اختیار کرگیا، واقعے میں کئی طلبہ زخمی ہوگئے۔طلبہ تنظیموں میں کشیدگی کے باعث قائداعظم یونیورسٹی غیر معینہ مدت کیلئے بند کردی گئی، رجسٹرار نے جامعہ کی بندش کا نوٹیفکیشن جاری کردیا۔واقعے کے بعد پولیس کی نفری کو بھی قائد اعظم یونیورسٹی میں طلب کرلیا گیا۔دوسری جانب ہاسٹل انتظامیہ نے بھی طلبہ و طالبات کو فوری طور پر ہاسٹل خالی کرنے کی ہدایت کردی۔