لاہور(نیوزڈیسک)الیکشن کمیشن نے ضلعی حکومت لاہور کو نئی بھرتیوں سے روک دیا۔ الیکشن کمیشن کا کہنا ہے کہ ضلعی حکومت لاہور نے 290 سینیٹری ورکرز کی بھرتی کی اجازت مانگی تھی، انتخابی شیڈول کے اعلان کے بعد نئی بھرتیوں پر مکمل پابندی ہے۔الیکشن کمیشن کا کہنا ہے کہ الیکشن کے انعقاد تک ضلعی حکومتیں نئی بھرتیوں سے باز رہیں، انتخابات سے قبل نئی بھرتیاں انتخابات پر اثر انداز ہوسکتی ہیں۔ الیکشن کمیشن نے پنجاب اور سندھ کے منتخب نمائندوں کو ترقیاتی فنڈز کے اجرا کا بھی نوٹس لے لیا۔ الیکشن کمیشن نے بلدیاتی انتخابات سے پہلے ترقیاتی فنڈز کا اجرا روک رکھا ہے۔ الیکشن کمیشن نے وفاقی سیکریٹری پلاننگ، ایڈیشنل چیف سیکریٹری ڈیولپمنٹ سندھ اور چیئرمین پی این ڈی پنجاب کو نوٹس جاری کردئیے۔ الیکشن کمیشن کے مطابق کسی بھی منتخب نمائندے کو ترقیاتی فنڈ کا اجراء نہ کیا جائے۔