نارووال (این این آئی )مسلم لیگ (ن) نے انتخابات سے قبل کارکنوں کے تحفظات دور کرنے کا فیصلہ کر لیا ،وفاقی وزیر احسن اقبال دیرینہ لیگی کارکن کو منانے اس کے گھر پہنچ گئے۔ بتایا گیا ہے کہ وفاقی وزیر ترقی و منصوبہ بندی احسن اقبال ،خواجہ وسیم بٹ اور
سابق سٹی چیئرمین پیر اظہر الحسن گیلانی کے ہمراہ مرکزی انجمن تاجران کے صدر و سابق نائب ناظم مزمل حفیظ کے گھر پہنچ گئے اس موقع پر انہوں نے مزمل حفیظ کی جانب سے سٹی جنرل سیکرٹری مسلم لیگ (ن)کے عہدے سے دیا گیا استعفیٰ نامنظور کردیا ۔احسن اقبال نے کہا کہ آپ جماعت کا قیمتی اثاثہ ہیں اور آپ اس ذمہ داری کو جاری رکھیں ،ماضی میں ہم سے جو غلطیاں ہوئیں ان کا پوری طرح ازالہ کیا جائے گا اور وہ لوگ جو مفاد پرست تھے اب ان کی پارٹی میں کوئی گنجائش نہیں ،ہم اب پارٹی کے اصل کارکنان کو پہچان چکے ہیں ان کے تحفظات کو دور کیا جائے گا اور انشااللہ ان کے ساتھ ہی آئندہ الیکشن میں بھرپور کامیابی حاصل کریں گے ۔
