لاہور( این این آئی)قومی احتساب بیورو ( نیب) نے سیکرٹری پنجاب اسمبلی محمد خان بھٹی کے خلاف کارروائی کا آغاز کر دیا ہے۔نجی ٹی وی نے نیب ذرائع کے حوالے سے کہا ہے کہ محمد خان بھٹی کے خلاف ناجائز اثاثے بنانے کی انکوائری شروع کردی ہے، محمد خان بھٹی کے اثاثوں کی چھان بین کیلئے ریکارڈ طلب کر لیا گیا۔ محمد خان بھٹی کو ملنے والی تنخواہیں، مراعات، سیشن الائونس کا ریکارڈ حاصل کر لیا گیا ہے۔ بینک نے سیکڑوں صفحات پر مشتمل ریکارڈ نیب کو جمع کروا دیا۔سیکرٹری پنجاب اسمبلی محمد خان بھٹی نے 2007 تا 2018 جبری رخصت پر ہونے کے باوجود تنخواہیں وصول کیں۔محمد خان بھٹی نے کروڑوں روپے کی غیر قانونی مراعات وصول کیں، نیب نے کروڑوں روپے کی مختلف ٹرانزیکشنز کا ریکارڈ بھی حاصل کر لیا۔سیکرٹری پنجاب اسمبلی محمد خان بھٹی کے خلاف ایف آئی اے، اینٹی کرپشن میں بھی مبینہ کرپشن کی تحقیقات جاری ہیں۔