پیرس(این این آئی) فرانسیسی میگزین چارلی ہیبڈو نے ایک مرتبہ پھر متنازع کارٹون شائع کیا ہے جس میں ترکیہ اور شام کے زلزلہ متاثرین کا مذاق اڑایا گیا ہے۔غیر ملکی میڈیا کے مطابق آرٹسٹ پیئرک جوئن کی ڈرائنگ میں ملبے کے ڈھیر کے درمیان منہدم عمارتوں کو دکھاتے ہوئے لکھا گیا ہے کہ

یہاں ٹینکس بھیجنے کی ضرورت نہیں ہے۔چارلی ہیبڈو کی جانب سے جاری کئے گئے کارٹون پر سوشل میڈیا صارفین پر غم و غصہ پایا جاتا ہے، صارفین نے فرانسیسی میگزین کو سخت تنقید کا نشانہ بنایا ہے۔سوشل میڈیا صارفین کا ہے کہ کارٹون نے اس سانحے کا مذاق اڑایا جس نے دو ممالک کے لاکھوں لوگوں کو متاثر کیا ہے۔ انہوں نے اس ڈرائنگ کو قابل نفرت، شرمناک، بغاوت اور نفرت انگیز تقریر کے مترادف قرار دیا ہے۔ایک خاتون صارف نے جواب دیتے ہوئے کہا کہ وہ میگزین کیلئے اپنی حمایت واپس لے رہی ہے۔ ایک صارف نے کہا کہ کارٹون میں چارلی ہیبڈو کی حقیقی روح کو دکھایا گیا ہے جبکہ دوسرے نے کہا کہ اس اخبار کی آمدنی کا واحد ذریعہ اسلامو فوبیا ہی ہے۔امریکی مسلمان سکالر عمر سلیمان نے کہا کہ ہزاروں مسلمانوں کی موت کا مذاق اڑانا اس بات کی انتہا ہے کہ کس طرح فرانس نے ہمیں ہر طرح سے غیر انسانی تصور کیا ہے۔