لاہور( این این آئی)پاکستان تحریک انصاف کے سینئر رہنما فرخ حبیب نے کہا ہے کہ عمران خان کی میڈیکل رپورٹس عدالت میں پیش کی ہیں، اگر عمران خان نے سفر کیا تو ہڈی فریکچر ہونے کا خدشہ ہے اس لئے عدالت عدالت ویڈیو لنک کے ذریعے عمران خان کا بیان لے۔

زمان پارک کے باہر میڈیا سے گفتگو کرتے ہوئے انہوں نے کہا کہ ڈاکٹروں نے عمران خان کو سفر کرنے سے منع کیا ہوا ہے اس لئے معزز عدالت سے استدعا ہے کہ ویڈیو لنک کے ذریعے بیان لے۔انہوںنے سوال کیا عمران خان کو سکیورٹی کون فراہم کرے گا؟ عمران خان پہلے ہی سکیورٹی خدشات کا اظہار کرچکے ہیں،عمران خان قوم کو بتا چکے کہ آصف علی زرداری نے افغانستان کی ایک تنظیم کو پیسے دئیے ہیں۔فرخ حبیب نے کہا کہ عمران خان کی نااہلی اور گرفتاری کی باتیں ہو رہی ہیں، الیکشن کمیشن سے متعلق معاملہ ہو تو پتہ ہوتا ہے خلاف ہی آنا ہے۔انہوں نے کہا کہ پارلیمان میں (ق)لیگ کی اکثریت پرویز الٰہی کے ساتھ ہے، پرویز الٰہی پی ٹی آئی میں آناچاہیں تو دروازے کھلے ہیں۔انہوںنے کہا کہ الیکشن کمیشن اس وقت سلیکشن کمیشن بنا ہوا ہے، ان سے پی ٹی آئی اور ہمارے اتحادیوں کیلئے کوئی ریلیف کی توقع نہیں۔