لندن (این این آئی)بھارتی وزیر اعظم نریندر مودی کی والدہ کے انتقال پر پاکستان کے سابق وزیراعظم میاں محمد نواز شریف نے ٹوئٹر پر تعزیت کا اظہار کیا ہے ۔خیال رہے کہ گزشتہ روز بھارتی وزیراعظم نریندر مودی کی والدہ انتقال کر گئی تھیں۔ بھارتی میڈیا کے مطابق 99 سالہ ہیرابین مودی

گجرات کے ایک اسپتال میں زیر علاج تھیں جہاں گزشتہ رات ان کی طبیعت بگڑ ی، طبی عملے نے نریندر مودی کی والدہ کو بچانے کی بھرپور کوشش کی تاہم وہ جانبر نہ ہو سکیں۔نریندر مودی نے سماجی رابطے کی ویب سائٹ ٹوئٹر پر اپنی والدہ کے انتقال کی تصدیق کرتے ہوئے انہیں خراج عقیدت پیش کیا اور لکھا کہ ماں کی ایک بات ہمیشہ یاد رہے گی کہ ذہانت سے کام لو اور زندگی پاکیزگی کے ساتھ گزارو۔وزیراعظم شہباز شریف نے بھی بھارتی وزیراعظم نریندر مودی کی والدہ کی وفات پر افسوس کا اظہار کیا تھا۔ٹوئٹر پر جاری بیان میں وزیراعظم شہبازشریف نے اپنے بھارتی ہم منصب کی والدہ کی وفات پر افسوس کا اظہار کرتے ہوئے کہا کہ ماں کو کھونے سے بڑا کوئی نقصان نہیں ہے۔اب نواز شریف نے مودی کی والدہ کی وفات کے حوالے سے ٹوئٹ میں کہا کہ پی ایم مودی کی والدہ کی وفات کا سن کر دکھ ہوا، اس ناقابل تلافی نقصان پر ہماری نیک تمنائیں نریندر مودی اور ان کے خاندان کے ساتھ ہیں۔