اسلام آباد(نیوزڈیسک)سیکرٹری سول ایوی ایشن محمد علی گردیزی نے کہا ہے کہ پی آئی اے 226ارب روپےکی مقروض ہے۔ ماہانہ 13ارب روپے قرض پرسود کی مد میں ادا کیے جاتےہیں ۔ قرضوں کو شیئرز میں تبدیل کرنے کیلئے بینکوں اور مالیاتی اداروں سے بات چل رہی ہے ۔سیکرٹری سول ایوی ایشن محمد علی گردیزی نے قومی اسمبلی کی قائمہ کمیٹی کابینہ کو بریفنگ میں بتایاکہ ایک بینک سے قرضہ لے کر دوسرے بینک کی قسط اداکی جاتی ہے۔ رکن کمیٹی مریم اورنگ زیب کاکہناتھاکہ پی آئی اے مسافروں کو ناقص کھانا فراہم کررہی ہے۔ 80فیصد مسافر کھانا واپس کردیتے ہیں ، ہوٹلوں کا بچاہوا کھانا پی آئی اے کو سپلائی ہورہاہے۔ ایسے ہوٹلوں سے معاہدہ کیوں کیا ۔ کمیٹی نے اس پررپورٹ طلب کرلی ۔کمیٹی نے پی آئی اے کے ملازمین کی تنخواہوں اور مراعات میں اضافے اور ٹیکس میں چھوٹ کی تجاویز مستردکردیں اور 28جولائی 2015کو روزنامہ جنگ میں چھپنے والی پی آئی اے میں 67 کروڑ روپے کی مالی بدعنوانی کی خبرکا نوٹس لیتے ہوئے معاملہ ایف آئی کے سپرد کردیا۔