لاہور (این این آئی)پاکستان تحریک انصاف کے چیئرمین عمران خان کا پارٹی کے لانگ مارچ سے غروب آفتاب کے فوراً بعد اچانک غائب ہو جانا اور پارٹی کے سیکرٹری جنرل اسد عمر کے اس اعلان نے کہ عمران خان ایک انتہائی اہم اجلاس میں شرکت کیلئے لاہور روانہ ہو ئے ہیں۔

میڈیا اور شرکا کو قیاس آرائیوں کی لپیٹ میں لے لیا۔میڈیا رپورٹ کے مطابق پی ٹی آئی کے رہنما فواد چوہدری اور پنجاب کی صدر ڈاکٹر یاسمین راشد نے پارٹی سربراہ کے کسی میٹنگ کیلئے روانہ ہونے کی تردید کی اور اصرار کیا یہ پہلے سے طے شدہ ایس او پی ہے کہ مارچ سیکیورٹی وجوہات کی وجہ سے اندھیرے میں سفر نہیں کریگا۔اچانک مارچ سے چلے جانے کے بعد پی ٹی آئی کے سربراہ اور طاقتوں کے درمیان ہونے والی بات چیت کے بارے میں بڑھتی ہوئی قیاس آرائیوں کے درمیان عمران خان نے خود ہی ان افواہوں کو ’بے بنیاد‘ قرار دے دیا۔ٹوئٹر پر ایک پیغام میں انہوں نے کہا کہ ان سب کے لیے جو لاہور میں میری ملاقات کی افواہیں پھیلا رہے ہیں، ہماری واپسی کی وجہ یہ تھی کہ لاہورقریب تھا، ہم پہلے ہی رات کو سفر نہ کرنے کا فیصلہ کرچکے تھے۔انہوں نے کہا کہ گزشتہ 6 ماہ سے میرا واحد مطالبہ صاف شفاف انتخابات کے فوری انعقاد کی تاریخ رہی ہے، اگر مذاکرات ہوئے بھی تو میرا واحد مطالبہ یہی رہے گا۔