اسلام آباد( آن لائن)وفاقی حکومت نے پاکستان تحریک انصاف کے مزید25 اراکین قومی اسمبلی کے استعفے منظور کرنے پر غور شروع کر دیا ہے ۔

پارلیمانی ذرائع کے مطابق سپیکر راجہ پرویز اشرف کو بھیجی گئی فہرست میں زیادہ تر اراکین کا تعلق جنوبی پنجاب سے ہے اور اس میں سابق وزیر خارجہ شاہ محمود قریشی اور ان کے بھانجے پیر ظہور حسین قریشی کا نام بھی شامل ہے تاہم استعفوں کی منظوری سے متعلق حتمی فیصلہ اتحادی جماعتیں کریں گی ،پارلیمانی ذرائع نے بتایا کہ شعبہ قانون سازی سے 25 اراکین کی فہرست مانگی گئی تھی جو انہوں نے اپنے کمنٹس کے ساتھ سپیکر راجہ پرویز اشرف کو بھجوا دی ہے تاہم راجہ پرویز اشرف استعفوں کی منظوری کے لئے اتحادی جماعتوں سے مشاورت کریں گے اور اس کے بعد فیصلہ ہوگا ،سپیکر اس سے پہلے تحریک انصاف کے 11 اراکین کے استعفے منظور کر چکے ہیں جن پر ضمنی انتخاب بھی ہو چکا ہے ،ذرائع کا کہنا ہے کہ تحریک انصاف پر دبائو بڑھانے کے لئے استعفے منظور کرنے پر غور کیا جارہا ہے ۔