راولپنڈی(این این آئی) پولیس نے میاں بیوی پر اینٹوں سے حملے کے الزام میں چارسالہ بچے پر مقدمہ درج کرلیا۔تفصیلات کے مطابق راولپنڈی پولیس کا نیا کارنامہ سامنے آگیا، تھانہ نصیر آباد میں 4سالہ معصوم بچے پر مقدمہ درج کرلیا گیا۔مقدمہ غلام مصطفی نامی شہری کی جانب سے درج کروایا گیا، 4سالہ کمسن بچے پر میاں بیوی پراینٹوں،پتھروں سے حملے کا الزام ہے۔کمسن احمد کو ضمانت کیلئے ایڈیشنل سیشن جج سہیل انجم کی عدالت میں پیش کیا گیا، دوران سماعت وکیل نے کہا کہ تھانہ نصیر آباد پولیس نے آنکھیں بند کرکے مقدمہ درج کیا، 4سالہ کمسن احمد پر جو دفعہ لگائی گئی اس کی سزا 10سال ہے۔وکیل کمسن احمد نے مطالبہ کیا کہ ایس ایچ او تھانہ نصیر آباد اور تفتیشی افسر کیخلاف کارروائی ہونی چاہیے۔عدالت نے اظہار برہمی کرتے ہوئے مقدمے کے تفتیشی افسر کو طلب کرلیا اور بچے کا نام مقدمے سے خارج کرنے کا حکم دے دیا۔