لاہور( این این آئی) مسلم لیگ(ن) نے پنجاب میں پارٹی کو متحرک کرنے کیلئے سر گرمیاں کرنے کا فیصلہ کر لیا ،10 اکتوبر کے بعد مریم نواز اور حمزہ شہباز ہر ضلع کادورہ کریں گے۔مسلم لیگ(ن) پنجاب کا تنظیمی اجلاس صدر رانا ثنااللہ کی
زیر صدارت پارٹی کے مرکزی سیکرٹریٹ ماڈل ٹائون میں منعقد ہو ا۔ اجلاس میں سیکرٹری جنرل احسن اقبال نے خصوصی طور پر شرکت کی جبکہ اس موقع پر پنجاب کے جنرل سیکرٹری اویس لغاری، عظمی بخاری، شیخ آفتاب، ملک ندیم کامران، طاہر سندھو،سائرہ افضل تارڑ، نائب صدور، ڈویژنل صدور،جنرل سیکرٹریز اور ذیلی تنظیموں کے صدور بھی موجود تھے ۔ اجلاس میں سابق رکن قومی اسمبلی رانا زاہد اور سیلاب سے جاں بحق ہونے والوںکے ایصال ثواب کیلئے فاتحہ خوانی کی گئی ۔ اجلاس میں سیلاب زدگان کی بھرپور مدد کرنے کے لئے امدادی کارروائیاں تیز کرنے کی ہدایت کی گئی ۔ اجلاس کو بتایا گیا ہے کہ 10 اکتوبر کے بعد مریم نواز اور حمزہ شہباز ہر ضلع کادورہ کریں گے اور عہدیداروں سے ملاقات کریں گے۔پارٹی تنظیموں کو اس سلسلہ میں پروگرام مرتب کرنے کی ہدایت کر دی گئی ہے۔
