اسلام آباد (این این آئی)وزیراعظم شہباز شریف نے مزید 2 معاونینِ خصوصی تعینات کر دئیے اس حوالے سے نوٹیفکیشن بھی جاری کر دیا گیا ہے۔سردار شاہ جہان یوسف اور ملک نعمان لنگڑیال وزیراعظم کے معاونِ خصوصی تعینات کیے گئے ہیں۔دوسری جانب سابق وزیر داخلہ شیخ رشید احمد نے اتحادی حکومت کی کابینہ ارکان کی تعداد کے خلاف عدالت سے رجوع کرلیا ۔شیخ رشید نے وفاقی کابینہ ارکان کی تعداد کے خلاف اسلام آباد ہائی کورٹ میں درخواست دائر کی ۔درخواست میں سابق وزیر داخلہ نے کہا کہ موجودہ وفاقی حکومت کی 72 رکنی کابینہ آئین کے آرٹیکل 92 کی شق 1 کی خلاف ورزی ہے۔شیخ رشید نے درخواست کے ذریعے عدالت عالیہ سے استدعا کی کہ اس معاملے کی سماعت ہنگامی بنیادوں پر کی جائے۔انہوں نے استدعا کی کہ درخواست سماعت کے لیے 23 ستمبر کو فکس کی جائے۔