ناخلف بیٹے نے اپنے ہی ایس ایچ او باپ پر گولی چلادی’موقع پر جاں بحق
کوہاٹ(این این آئی)قبائلی ضلع اوکرزئی میں ناخلف بیٹے نے اپنے ہی ایس ایچ اوباپ پر گولی چلادی جس کی زدمیں آکروہ موقع پر ہی جاں بحق ہوگیا۔
پولیس نے چھاپہ مارکر ملزم کو حراست میں لے کر سلاخوں کے پیچھے ڈال دیا۔ پولیس کے مطابق قبائلی ضلع اورکزئی کی اپرتحصیل کے پولیس سٹیشن ڈبوری کے ایڈیشنل ایس ایچ اومحمدجان کو گزشتہ شام گھر کے اندرہی جواں سال ناخلف بیٹے نے آتشیں اسلحہ سے گولی ماردی جس سے وہ موقع پر جاں بحق ہوگیا۔جاں بحق پولیس افسر کو فوری طوپر مقامی ہسپتال منتقل کردیا گیا جہاں اْن کی موت کی تصدیق ہوگئی ۔واقعہ کی اطلاع ملتے ہی پولیس سٹیشن ڈبوری کے ایس ایچ او امتیاز خان نے پولیس نفری کے ہمراہ چھاپہ مارکر ملزم کو گرفتار کرلیا اور مقدمہ درج کرکے پابندسلاسل کردیا۔ پولیس نے واقعہ کی مزید تفتیش شروع کردی ہے تاہم ابتدائی اطلاعات کے مطابق وجہ قتل گھریلو رنجش بتائی جاتی ہے۔