کراچی ، لاہور(مانیٹرنگ ڈیسک ، این این آئی)سندھ کے شہر ٹنڈو آدم میں سیلابی ریلے داخل ہو گئے، جس کے باعث درجنوں مکانات ڈوب گئے۔انتظامیہ نے ہیوی مشینری طلب کر کے سیلابی ریلے کو روکنے کے لیے کام شروع کر دیا ہے۔دوسری جانب مٹیاری میں قومی شاہراہ پر

پانی آنے سے ٹریفک متاثر ہو گئی ہے۔ادھر خیرپور میں متاثرین نے کھلے آسمان تلے رات گزاری، دادو کے متاثرین کو محفوظ مقامات کی طرف منتقل کردیا گیا ہے۔فلڈ کنٹرول روم کا کہنا ہے کہ دریائے سندھ میں پانی کی سطح میں مسلسل اضافہ جاری ہے، آج اور کل بڑے سیلابی ریلوں کی آمد متوقع ہے۔دوسری جانب وفاقی وزیر اطلاعات و نشریات مریم اورنگزیب نے کہا کہ پاکستان میں شدید بارشوں اور سیلابی ریلوں سے جس سطح پر تباہی ہوئی ہے کوئی بھی حکومت اکیلے متاثرین کو ریلیف اور ان کی بحالی کا عمل مکمل نہیں کر سکتی ، پاکستانی قوم نے جس طرح 2005ء کے زلزلے اور2010ء میں آنے والے سیلاب کے موقع پر جذبہ دکھایا تھا آج پھر اسی کی ضرورت ہے ،پاکستان میں مجموعی طور پر تاریخ میں پہلی بار 190فیصد سے زیادہ بارشیں ہوئی ہیں،بلوچستان اور سندھ میں400سے480فیصد سے زیادہ بارشیں اور سیلابی ریلے آئے ہیں جس سے ہر چیز تباہ ہو گئی ہے ۔ وزیر اعظم شہباز شریف کے ہمراہ لاہور سے سجاول روانگی سے قبل میڈیا سے گفتگو کرتے ہوئے مریم اورنگزیب نے کہا کہ پاکستان میں اس طرح کاسیلاب پہلے کبھی نہیں آیا،پہلے بلوچستان کے علاقے بری طرح متاثر ہوئے اب سندھ میں بھی بارشوں اور سیلاب سے تباہی ہو رہی ہے ۔