پولیس افسران انتقامی کارروائی سے خوفزدہ
لاہور( این این آئی) کیپٹل سٹی پولیس چیف غلام محمود ڈوگر نے 25مئی کے معاملے پر چار رکنی کمیٹی تشکیل دے دی ۔
ایس ایس پی انوسٹی گیشن عمران کشور کوکمیٹی کا سربراہ مقرر کیا گیا ہے جبکہ کمیٹی میںایس ایس پی ایڈمن ، ایس پی ڈسپلن اور ایس پی سکیورٹی شامل ہیں۔
کمیٹی کی جانب سے 25 مئی کو ڈیوٹی پر موجود ایس ڈی پی اوز اور ایس ایچ اوز کی طلبی کی گئی اور ان سے ان کے ڈیوٹی پوائنٹس پوچھے گئے ۔
کمیٹی کی جانب سے افسران سے 25 مئی کو ہونے والے واقعہ کے بارے میں بھی سوالات کیے گئے ۔
کمیٹی نے تمام افسران کو تحریری بیان بھی جمع کرانے کی ہدایت کردی ہے تاہم افسران نے تاحال تحریری بیان دینے سے اجتناب کیا ہوا ہے۔ پولیس ذرائع کے مطابق مبینہ طو رپر چھوٹے افسران کا کہنا ہے کہ اعلی افسران کو بچانے کے لیے ملبہ ہمارے اوپر ڈالا جاسکتاہے ۔
