اسلام آباد (مانیٹرنگ، این این آئی) عوامی مسلم لیگ کے سربراہ شیخ رشید احمد کا بجلی کا بل بھی ہزاروں میں آ گیا، ان کا کہنا تھا کہ جس جگہ سیلاب نہیں آیا وہاں شہباز شریف کا عذاب آیا ہوا ہے، ان کا کہنا تھا کہ تحریک انصاف کی حکومت جتنی چار برسوں میں

بدنام ہوئی اتنی موجودہ حکومت چار مہینوں میں ہوئی، ہر جگہ بجلی کے بل جلائے گئے، لوگوں کے پاس کرایہ نہیں ہے۔ انہوں نے اپنے بل کا بتایا کہ ان کا بل ساٹھ ہزار روپے آیا ہے۔ دوسری جانب انہوں کہاہے کہ عدلیہ محسوس کرتی ہے اوورسیز پاکستانیوں کو ووٹ کا حق ہونا چاہیے۔ سپریم کورٹ کے باہر میڈیا سے گفتگو کرتے ہوئے انہوں نے کہاکہ عدلیہ بھی محسوس کرتی ہے کہ اوورسیز پاکستانیوں کو ووٹ کا حق ہونا چاہیے۔ انہوں نے کہاکہ اوورسیز پاکستانیوں کو ووٹ کا حق ملنے سے آئندہ الیکشن کا نتیجہ اہم ہو گا۔ انہوں نے کہاکہ پی ڈی ایم میں پھوٹ پڑ چکی ہے، مسلم لیگ (ن)اور (ش)آمنے سامنے آنے والی ہے۔ انہوں نے کہاکہ اس ملک میں دہشتگردی کو گلی ڈنڈے کا کھیل بنا دیا گیا ہے، 13 جماعتیں عمران خان کو دیوار سے لگانا چاہتی ہیں۔ انہوں نے کہاکہ کوئی شخص اداروں سے بڑا نہیں ہے اور کوئی ادارہ پاکستان سے بڑا نہیں ہے، اسی سال الیکشن ہوتے دیکھائی دے رہے ہیں۔ سابق وزیر نے کہاکہ جن جگہوں سیلاب نہیں آیا وہاں شہباز شریف کا عذاب آیا ہوا ہے، میں لندن گیا ہی نہیں دبئی گیا تھا۔ انہوں نے کہاکہ پاکستان میں سب سے مظلوم طبقہ صحافی ہو گئے ہیں، نیٹ بند ہونا عمران خان کی تقریر کو ہٹانے کی مشق تھی۔