اسلام آباد(این این آئی)پنجاب کے ضمنی الیکشن کے نتائج سامنے آنے کے بعد وزیراعظم شہباز شریف نے اپنے ٹوئٹر پر جاری بیان میں کہا ہے کہ میں ضمنی انتخابات کیلئے انتھک کوششوں پر پاکستان مسلم لیگ (ن)کے رہنماں اور ورکرز کا مشکور ہوں۔وزیراعظم نے مریم نواز اور
حمزہ شہباز کو سراہتے ہوئے کہا کہ دونوں نے پارٹی کیلئے بہترین انتخابی مہم چلائی۔شہباز شریف نے مزید کہا کہ پر امن انتخابات کے انعقاد پر وزیرِ اعلیٰ حمزہ شہباز کی قیادت میں پنجاب حکومت مبارکباد کی مستحق ہے۔دوسری جانب پاکستان علماء کونسل نے ملک کی تمام سیاسی و مذہبی جماعتوں سے صاف شفاف انتخابات کیلئے اصلاحات لانے اور مذاکراتی عمل شروع کرنے کا مطالبہ کرتے ہوئے کہا ہے کہ پنجاب میں ہونے والے ضمنی انتخابات کے نتائج واضح کر رہے ہیں کہ ملک میں معاشی صورتحال کی بہتری اور استحکام کیلئے فوری طور پر صرف شفاف انتخابات کا فیصلہ کیا جائے اور اس کیلئے تمام سیاسی و مذہبی جماعتیں مذاکراتی عمل کا آغاز کریں۔ پاکستان علما کونسل کے چیئرمین حافظ محمد طاہر محمود اشرفی، علامہ عبد الحق مجاہد اور دیگر نے ایک مشترکہ بیان میں کہا ہے کہ پنجاب کے ضمنی انتخابات کے رزلٹ کو تمام جماعتوں کا تسلیم کرنا ایک خوش کن امر ہے ۔ چیف آف دی آرمی سٹاف جنرل قمر جاوید باجوہ کی ہدایات کے مطابق افواج پاکستان اور اس سے متصل اداروں نے سیاسی عمل سے علیحدہ رہ کر درست سمت قدم اٹھایا ہے ۔ یہ ایک تاریخی موقع ہے جس پر سب سیاسی و مذہبی جماعتوں کو مستقبل کیلئے غور و فکر کرتے ہوئے پاکستان کو ایک حقیقی اسلامی فلاحی ریاست بنانے کی طرف لے جانے کی کوشش کرنی ہو گی۔
