کراچی (نیوزڈیسک) پی آئی اے کی انتظامیہ نے بدعنوانی کے ضمن میں مکمل عدم برداشت کی پالیسی کا مظاہرہ کرتے ہوئے اپنے 3 ملازمین کو ایک مسافر کو غیر مجاز بورڈنگ کارڈ جاری کرنے پر برطرف کردینے کا بے باک قدم اُٹھایا ہے۔ مذکورہ ملازمین نے محمد اکرم نامی مسافر کو لاہور ائرپورٹ سے ٹورونٹو جانے والی پرواز کے لیے check-in کے مراحل سے گزارا تھا۔برطرف کیے جانے والے ملازمین میں حامد بٹ، سینیئر پیسنجر سروسز آفیسر؛ آصف ارزانی خان، ریزرویشن اینڈ ٹکٹنگ آفیسر اور سمیرا یاسمین، check-in اسٹاف شامل ہیں۔ پیسنجر سروسز سپروائزر ذوالفقار ڈار کو بھی معطل کردیا گیا ہے۔ایف آئی اے امیگریشن، لاہور نے مذکورہ افراد کے خلاف ایف آئی آر درج کرلی ہے۔ حامد اور آصف ایف آئی اے کی حراست میں ہیں جبکہ سمیرا ضمانت پر ہے۔جناب ناصر این ایس جعفر، چیئرمین ،پی آئی اے اور جناب شاہنواز رحمٰن، منیجنگ ڈائرکٹر، قومی ائرلائن کی بحالی کے لیے مربوط کوششیں کررہے ہیں اور آپریشنز کے مختلف اہم شعبوں پر خصوصی توجہ دے رہے ہیں۔انہوں نے ائرلائن سے بدعنوانی کے خاتمے کے لیے مکمل عدم برداشت کی پالیسی نافذ کی ہے۔ پی آئی اے کی اعلیٰ انتظامیہ وزیر اعظم پاکستان محمد نواز شریف کے وژن پر عمل کرتے ہوئے وزیر اعظم کے خصوصی مشیر برائے ایوی ایشن جناب شجاعت عظیم کے تعاون سے ادارے میں احتساب کے رجحان کو عام کرنے اور معیاری کسٹمر سروس فراہم کرنے کی انتھک کوششیں کررہی ہے۔