اسلام آباد (این این آئی)چیئرمین پی ٹی آئی عمران خان عمران خان نے نوجوانوں کو ٹائیگر فورس میں شمولیت کی دعوت دیتے ہوئے Tigerforce.com.pk ویب سائیٹ لانچ کر دی۔ اپنے بیان میں سابق وزیر اعظم نے کہاکہ اپنی ٹائیگر فورس، خواتین اور نوجوانوں سے مخاطب ہوں،

ہمارا ملک جس موڑ پر کھڑا ہے وہاں آپ کی ضرورت ہے۔ انہوں نے کہاکہ ہمارے ملک میں بیرونی مداخلت کے ذریعے ایک حکومت مسلط کی گئی۔ انہوں نے کہاکہ 30 سالوں سے ملک کا خون چوسنے والے مجرموں کو اقتدار دیا گیا۔ انہوں نے کہاکہ دو خاندانوں نے جھک جھک کر بیرونی طاقتوں کی غلامی کی،یہ پھر اس لئے اقتدار میں لائے گئے تا کہ باہر کے ایجنڈے پر چلیں،یہ ہمارا انصاف کا نظام تباہ کر دیں گے۔ انہوں نے کہاکہ نیب اور ایف آئی اے تباہ کر دی ہے،خ1100 ارب روپے کی چوری پر خود کو این آر او دیا گیا۔ انہوں نے کہاکہ ایف آئی اے میں 16 ارب روپے کے کیسز دفن کر دئیے،اب یہ ایسا ماحول بنا رہے ہیں کہ عدالتوں سے بھی بچ جائیں۔ انہوں نے کہاکہ یہ کبھی بھی صاف اور شفاف الیکشن نہیں ہونے دیں گے۔ انہوں نے کہاکہ پنجاب کے 20 حلقوں کے الیکشن میں ابھی سے دھاندلی ہو رہی ہے،پارٹی کی لیڈرشپ پر ایف آئی آر کاٹی ہوئی ہے،میرے اوپر 9 ایف آئی آر درج کرائی گئی ہیں۔ انہوں نے کہاکہ پارلیمنٹ ختم ہو گئی پنجاب میں بھی تماشا لگا رکھا ہے۔ انہوں نے کہاکہ قومی اسمبلی میں ایسے شخص کو اپوزیشن لیڈر بنایا جو ن لیگ کے ٹکٹ پر الیکشن لڑے گا۔ انہوں نے کہاکہ میڈیا پر فاشسٹ ہتھکنڈوں کے ذریعے بد ترین سختیاں مسلط کی گئی ہیں۔ انہوں نے کہاکہ نامور اینکرز پر ایف آئی آر ہی، میڈیا مالکان کو کالز کے ذریعے دھمکایا جا رہا ہے،سوشل میڈیا پر لوگوں کو دھمکایا جا رہا ہے۔

انہوں نے کہاکہ یہ صرف پاکستان کے ادارے تباہ کر کے خود کو مسلط کرنا چاہتے ہیں۔انہوں نے کہاکہ 60 فیصد کابینہ کرپشن کیسز میں ضمانتیں لے کر بیٹھی ہیں،نوجوانوں سے کہتا ہوں خود کو رجسٹر کریں اور ٹائیگر فورس جوائین کریں،انتخابی مرحلے میں نوجوان ہماری مدد کریں۔ انہوں نے کہاکہ ٹائیگر فورس عوام کو گھر گھر جا کر نکالے،پنجاب کے ضمنی الیکشن میں سب نے حصہ لینا ہے۔ انہوں نے کہاکہ عام انتخابات میں بیرونی طاقت سے مسلط مافیا کو شکست دینا ہے،آپ رجسٹریشن مکمل کریں میں جلد آپ سے بات کروں گا۔