ضمنی انتخابات میں کامیابی کیلئے حکمت عملی طے، ن لیگ نے اہم فیصلہ کر لیا
لاہور(این این آئی)پنجاب کے 20حلقوں میں ہونے والے ضمنی انتخابات میں کامیابی کیلئے حکمت عملی طے کرنے کیلئے مسلم لیگ (ن) کا مشاورتی اجلاس پارٹی سیکرٹریٹ ماڈل ٹاؤن میں منعقد ہوا۔
اجلاس میں وزیر اعلیٰ پنجاب حمزہ شہباز، مسلم لیگ (ن) کی مرکزی نائب صدر مریم نواز، وزیر داخلہ رانا ثنا اللہ، وزیر ریلوے خواجہ سعد رفیق،عبد الرحمان کانجو، جگنو محسن سمیت دیگر شریک ہوئے۔
اجلاس میں مجموعی سیاسی صورتحال، پنجاب کے 20حلقوں میں ہونے والے ضمنی انتخاب کیلئے رابطہ عوام مہم سمیت کامیابی کیلئے حکمت عملی مرتب کی گئی۔
اجلاس میں فیصلہ کیا گیا کہ مریم نواز تمام حلقوں میں امیدواروں کی انتخابی مہم چلائیں گی۔ حلقوں کے رہنما ووٹروں اور عوام سے بھرپور رابطے کریں گے۔
اجلاس میں کہا گیا کہ ہم نے بھرپور اتحاد کے ساتھ انتخابی میدان میں اترنا ہے اور ان شا اللہ تمام حلقوں میں کامیابی حاصل کریں گے۔
