اسلام آباد (آن لائن)نئی گاڑیوں کی خریداری پرپابندی اور کفایت شعاری کے حکومتی اقدامات کوہوا میں اڑاتے ہوئے چئیرمین پی سی بی رمیض راجہ نے کرکٹ بورڈ سے نئی بلٹ پروف فارچون کار حاصل کرلی ۔ ذرائع کے مطابق چئیرمین پی سی بی کی جان کوکوئی خطر نہیں
اس کے باوجود انہوں نے پی سی بی سے انتہائی قیمتی گاڑی حاصل کی جسے بلٹ پروف بنادیا گیا اور اس پر بھاری رقم خرچ کرکے کرکٹ بورڈ کے بجٹ کو ضائع کردیا گیا جبکہ رمیض راجہ کاشروع میں کہناتھا کہ ہم پی سی بی فنڈز کو پروٹوکول پر خرچ نہیں کرتے۔ذرائع کا کہنا ہے کہ ڈائریکٹر ہیومن ریسورس میڈم سریناپی سی بی سے ماہانہ تقریباً سات لاکھ روپے تنخواہ حاصل کررہی ہیں تاہم وہ نچلے عملے کے حق میں نہیں ہیں حتیٰ کہ ڈیلی ویجز ملازمین کو مہینہ کے آخر میں تنخواہ دی جاتی ہے اورڈائریکٹر ایچ آر کے رویے کی وجہ سے غریب دیہاڑی دار ملازمین انتہائی کسمپرسی کی زندگی گزارنے پر مجبور ہیں۔یاد رہے میڈم سریناکو یواے ای سے کسی اعلی سطحی شخصیت کی ایماء پر لایا گیا ہے۔انہوں نے اپنے منیجر ایچ آر کے ساتھ ملکر نچلے ملازمین کے خلاف ایک مہم شروع کررکھی ہے اور انکی تنخواہوں اور مراعات میں تاخیری حربے استعمال کئے جاتے ہیں۔ذرائع کا مزید کہنا ہے کہ ڈائریکٹر ایچ آر نے نئے بھرتی شدہ ڈرائیورز کو ریگولر کردیا جبکہ پرانے ڈرائیورز ابھی تک مستقل ہونے کے انتظار میں بیٹھے ہیں۔معاملے سامنے آنے پر انہوں نے دیگر ڈرائیورز کو بھی مستقل کردیا۔ذرائع کے مطابق چیرمین پی سی بی رمیض راجہ کے علم میں یہ ساری صورتحال ہونے کے باوجود وہ ڈائریکٹر ایچ آر کے رویے کی وجہ سے خاموش ہیں اور میڈم سرینا کی حمایت اور دفاع کررہے ہیں۔
