لاہور(این این آئی)وزیراعظم شہباز شریف نے سپیکر قومی اسمبلی راجہ پرویز اشرف سےپیر کے روز قومی اسمبلی میں ناموس رسالتﷺکے معاملے پر بحث کرانے کی درخواست کردی۔وزیر اعظم شہباز شریف نے کہا کہ بی جے پی کے لیڈروں کی ہرزہ سرائی کی شدید مذمت کرتے ہیں،دنیا کے سوا ارب مسلمانوں کے دل کا خون کیاگیا ہے جس پر تمام مسلمان سراپا احتجاج ہیں۔ شہباز شریف نے کہا کہ آقا کریمﷺ سے ہماری عقیدت و محبت کے اس اہم اور نازک معاملے پر ایوان میں بحث کرائی جائے،بھارت میں ہونے والے اس قابل مذمت واقعے کے خلاف ایوان قرارداد منظور کرے،قرارداد کے ذریعے بھارت سمیت پوری دنیا کو بتا دینا چاہتے ہیں کہ آقا کریم ﷺکی حرمت کے لئے ہم ہر قربانی دینے کو تیار ہیں۔