لاہور(نیوز ڈیسک) پاکستان کرکٹ بورڈ نے اسپاٹ فکسنگ کیس میں ملنے والی سزا سے گزشتہ روز ہی رعایت پانے والے کھلاڑیوں سلمان بٹ اور محمد آصف کو ڈومیسٹک اور ٹی ٹوئنٹی کرکٹ کھیلنے سے روک دیا ہے۔
نجی ٹی وی کے مطابق گزشتہ روز آئی سی سی کی جانب سے دونوں کھلاڑیوں پر لگی پابندی 5 سال مکمل ہونے پر ہٹا دی گئی جس کے بعد لاہور سٹی کرکٹ ایسوسی ایشن نے سلمان بٹ اور محمد آصف کو ٹیم میں شامل کرنے کا اعلان کیا تھا۔ ذرائع پی سی بی کا کہنا ہے کہ حکام نے لاہور کرکٹ ایسوسی ایشن کو دونوں کھلاڑیوں کو ٹیم میں شامل کرنے سے منع کیا ہے جب کہ دونوں کھلاڑیوں کو بھی حکم دیا گیا ہے کہ جب تک پی سی بی حکام دونوں کھلاڑیوں کو کھلانے سے متعلق باقاعدہ فیصلہ نہیں کر لیتے تو اس وقت تک کسی بھی ٹیم کی جانب سے کھیلنے سے گریز کیا جائے۔
دوسری جانب سلمان بٹ کا میڈیا سے گفتگو کرتے ہوئے کہنا تھا کہ پابندی ہٹانے میں پی سی بی سے بہت ساتھ دیا اور اب ماضی کو بھلا کر پاکستان کے لئے کرکٹ کھیلنا چاہتے ہیں۔ ان کا کہنا تھا کہ نوجوان کھلاڑیوں کو ہم سے سبق سیکھنا چاہیئے تاکہ انہیں اس قسم کے مسائل کا سامنا نہ کرنا پڑے۔
واضح رہے کہ 2010 میں انگلینڈ کے خلاف ٹیسٹ میچ میں اسپاٹ فکسنگ کے الزام میں اس وقت کے ٹیسٹ کپتان سلمان بٹ پر 10 سال، محمد آصف پر 7 سال اور محمد عامر پر 5 سال کی پابندی لگائی تھی۔