اسلام آباد،لاہور (این این آئی)صدر پاکستان ڈاکٹر عارف علوی نے محمد بلیغ الرحمان کی بطور گورنر پنجاب تقرری کی منظوری دے دی ہے۔ انہوں نے یہ منظوری وزیراعظم کے مشورے پر اسلامی جمہوریہ پاکستان کے آئین کے آرٹیکل 101 (1) اور آرٹیکل 101 (5) کے
ساتھ ساتھ آرٹیکل 48 (1) کے تحت دی۔واضح رہے کہ 7 مئی کو وزیراعظم شہباز شریف کی ایڈوائس پر پاکستان مسلم لیگ (ن )سے تعلق رکھنے والے بلیغ الرحمن کا نام گورنر پنجاب کے لیے صدر مملکت کو ارسال کیا گیا تھا، تاہم صدر مملکت نے وزیراعظم کی ارسال کی گئی سمری کو مسترد کر دیا تھا۔سمری مسترد کرنے وقت صدر مملکت نے موقف دیا تھا کہ عمر سرفراز چیمہ اب بھی گورنر پنجاب کے عہدے پر فائز ہیں، نئی تقرری کا کوئی جواز نہیں،آئین کے آرٹیکل 101 (2) کے تحت گورنر صدر کی خوشنودی تک عہدے پر فائز رہے گا، موجودہ ملکی حالات کا تقاضا ہے کہ موجودہ گورنر اپنے عہدے پر برقرار رہیں۔دوسر ی جانب گورنر پنجاب بلیغ الرحمان کے حلف اٹھانے کے بعد صوبائی کابینہ بغیر کسی تاخیر کے حلف اٹھائے گی ۔ ذرائع کے مطابق حمزہ شہباز نے کابینہ کے اراکین او ران کے محکموں کے نام فائنل کر لئے ہیں ۔ ذرائع کے مطابق صوبائی کابینہ دو مراحل میں حلف اٹھائے گی ۔ ذرائع کے مطابق سردار اویس لغاری کو محکمہ بلدیات،ملک محمد احمد خا ن کو وزیر قانون،رانا مشہود احمد خان کو وزیر تعلیم، مجتبیٰ شجاع الرحمان کو وزیر خزانہ ،خواجہ عمران نذیر اور خواجہ سلمان رفیق صحت کے محکموں کے قلمدان سونپے جانے کا امکان ہے۔
