اسلام آباد (این این آئی) پاکستان مسلم لیگ (ن) نائب صدر مریم نواز نے تحریک انصاف کے جلسے کے حوالے سے کہاہے کہ اپنی بے مقصد کی سیاست اور فتنے بازی کہیں اور جا کر کرو،اس کیلئے پورے سیالکوٹ میں چرچ کے علاوہ اور کہیں جگہ نہیں ملی ؟۔ ٹوئٹر مریم نواز نے مسیحی برادری کی جانب سے لگائے گئے احتجاجی بینرز کی تصویر شیئرکرتے ہوئے کہاکہ
حکومت کی اولین ذمے داری،پاکستان میں بسنے والی تمام اقلیتوں کے حقوق کی رکھوالی ہے،کئی دنوں سے مسیحی برادری اس بات پر سراپا احتجاج ہے کہ چرچ کی گراونڈ میں جلسہ انکی عبادت گاہ کی توہین ہے۔ انہوںنے کہاکہ جلسہ کرنا تمہارا حق ہے، مذہبی جذبات کو ٹھیس پہنچانا نا تمہارا حق ہے نا تمہیں اس کی اجازت ہوگی۔دوسری جانب وفاقی وزیر اطلاعات و نشریات مریم اورنگزیب نے کہا ہے کہ عمران خان اور ان کی جماعت مسیحی برادری کے مذہبی جذبات کا احترام کریں، نالائق، نااہل، فاشسٹ، کرپٹ اور چوروں کو عوام جلسے کیلئے جگہ نہیں دینا چاہتے تو اس میں حکومت کہاں سے آگئی؟ اگر عوام انہیں جلسے کے لئے نجی ملکیتی جگہ دینے کو تیار نہیں تو اس میں وزیر داخلہ رانا ثنا اللہ کا کیا قصور ہے؟ عمران نیازی چاہتے ہیں کہ رانا ثنا اللہ زور زبردستی نجی ملکیت پر جلسے کا بندوبست کرائیں، عوام عمران خان کے غلام نہیں، حکومت قانون کے تحت وہ جگہ عمران نیازی کو جلسے کیلئے نہیں دے سکتی جو نجی ملکیت ہے۔ہفتہ کو اپنے ایک بیان میں انہوں نے کہا کہ مسیحی برادری اپنی جگہ جلسے کیلئے دینے کو تیار نہیں کیونکہ یہ جگہ عبادت کے لئے مختص ہے۔ مریم اورنگزیب نے کہا کہ عمران خان مسیحی برادری کا احترام کریں، غنڈہ گردی نہ کریں۔ انہوں نے کہا کہ مسیحی کمیونٹی سراپا احتجاج ہے، حکومت ان کے احتجاج کو نظر انداز نہیں کر سکتی۔ انہوں نے کہا کہ عمران نیازی مذہبی منافرت پھیلا کر اسی جگہ کیوں جلسہ کرنے پر بضد ہیں۔ انہوں نے کہا کہ پی ٹی آئی کو گورنمنٹ مرے کالج گرائونڈ اور اسپورٹس جمنازیم پسرور پر جلسہ کرنے کی تجویز کیوں قبول نہیں؟ اس کا صاف مطلب ہے کہ عمران نیازی صرف ڈرامہ کرنا چاہتے ہیں، ان کا مقصد صرف تماشا لگانا ہے۔ انہوں نے کہا کہ مسلم اور غیر مسلم مذہبی قائدین عمران نیازی کو سمجھائیں کہ مسیحی برادری کے جذبات کا احترام کریں۔
