فیصل آباد(آن لائن ) وفاقی وزیر داخلہ رانا ثناء اللہ خان نے کہا ہے کہ اتحاد یوں سے ملکر آئینی طریقے سے ایک فاشسٹ اور نااہل سیلیکٹڈ حکومت کو گھر بھیجا،عمران نیازی کا چار سالہ دور حکومت جھوٹ ، جھوٹ اور صرف جھوٹ پر محیط تھا ،معیشت، خارجہ تعلقات، سماجی ترقی، غریب عوام کی فلاح پر جھوٹ بولے گئے،
کرپشن، نااہلی، لاقانونیت اوراقرباپروری کا ایک سیاہ دور جو بلآخراختتام پذیر ہوا ۔ تفصیلات کے مطابق وزیر داخلہ رانا ثناء اللہ خان کے اعزاز میں فیصل آباد میں استقبالیہ تقریب کا انعقاد کیا گیا ۔ تقریب کے شرکاء نے رانا ثناء اللہ کو وزیر داخلہ تعینات ہونے پروالہانہ استقبال کیا ۔ وزیر داخلہ رانا ثناء اللہ خان نے استقبالیہ تقریب سے خطاب کرتے ہوئے حلقے کے عوام سے شکرئیے کااظہار کیا ۔ وزیر داخلہ کا کہناتھا کہ سفارتی مراسلے جیسے حساس معاملے کو جلسے جلوسوں میں تماشہ بنا کر ملکی مفاد کو ناقابل تلافی نقصان پہنچایاجارہا ہے۔ عمران نیازی جھوٹے پروپیگنڈے سے پاکستانی عوام کو گمراہ کرکیاداروں کے خلاف اکسارہا ہے۔ ہوسِ اقتدار اورخوفِ احتساب سے ملکی اداروں کی ساکھ پر حملے کررہا ہے۔ عمران نیازی کی ہرزہ سرائی سے پاکستان کے دشمن فائدہ اٹھا رہے ہیں۔ وزیر داخلہ رانا ثناء اللہ نے کہا بنی گالہ میں بیٹھا ایک شخص ‘‘میں ناں مانوں’’ کی گردان مسلسل الاپ رہا ہے۔ انتخابات میں پتہ چلے گا عوام کس کے ساتھ ہیں۔ ہم عمران نیازی کی طرح سیلیکٹڈ نہیں، انتخابات کے ذریعے اقتدار میں آنے والی جماعت ہیں۔ ہم سیاسی انتقام نہیں لیں گے لیکن عوامی وسائل پر ڈاکے کا حساب ضرور لیں گے۔ ہماری حکومت عوام کو اندھیروں سے نکالے گی۔روشنیاں اور امیدیں واپس لائے گی۔ فیصل آباد کے عوام نواز شریف سے پیار کرنے والے لوگ ہیں۔ فیصل آباد کی صنعتیں بحال کرینگے۔ روزگار کے مواقع پیدا کرینگے۔
