لندن (آئی این پی )برطانوی حکومت نے زیک گولڈ اسمتھ کے سابق وزیر اعظم عمران خان کے حق میں بیان سے لاتعلقی کا اعلان کردیا۔عمران خان کی سابقہ اہلیہ جمائما کے بھائی اور برطانوی وزیر زیک گولڈ اسمتھ نے گزشتہ روز پاکستان کی قومی اسمبلی میں رات گئے تحریکِ عدم اعتماد پر ووٹنگ اور اس کی

کامیابی پر ردعمل دیا تھا۔انہوں نے اپنی ٹوئٹ میں لکھا کہ پاکستان میں گزشتہ رات کے واقعات دیکھ کر دکھ ہوا، عمران خان ایک اچھے اور مہذب آدمی ہیں، وہ عالمی سطح پر سب سے کم کرپٹ سیاستدانوں میں سے ایک ہیں’۔زیک گولڈ اسمتھ نے کہا کہ کوئی شک نہیں کہ عمران خان آئندہ انتخابات میں بڑی اکثریت سے لوٹیں گے۔غیر ملکی میڈیا کے مطابق تاہم اب برطانوی وزریر اعظم کے ترجمان نے زیک کے بیان سے لاتعلقی کا اعلان کرتے ہوئے کہا ہے کہ’ ان کے بیان کا حکومتی پالیسی سے کوئی تعلق نہیں’۔برطانوی وزیر اعظم کے نائب ترجمان نے کہا کہ برطانیہ پاکستان کے داخلی معاملات میں مداخلت نہیں کرے گا، انہوں نے مزید کہاکہ ‘ہم پاکستان کے سیاسی نظام کا احترام کرتے ہیں۔’واضح رہے کہ زیک گولڈ اسمتھ برطانوی وزیرِ مملکت برائے بحرالکاہل اور بین الاقوامی ماحولیات ہیں۔یاد رہے کہ عمران خان نے 1995 میں جمائما گولڈ اسمتھ سے شادی کی تھی۔