اسلام آباد (این این ائٓی) ترجمان پی ڈی ایم حافظ حمد اللہ نے کہاہے کہ دیر تیمرگرہ میں مسجد اور مدرسے پر حملہ کھلی دہشت گردی اور اسلام دشمنی ہے۔پی ٹی آئی کے کارکنوں کی طرف سے مدرسے پر مبینہ حملے پر ترجمان پی ڈی ایم حافظ حمد اللہ نے کہاکہ گزشتہ رات دیر تیمرگرہ میں مسجد اور مدرسے پر حملہ کھلی دہشت گردی اور اسلام دشمنی ہے۔
انہوںنے کہاکہ حملے میں امام مسجد طلباء اور تبلیغی جماعت پر سخت ترین تشدد کیا گیا، یہاں تک کہ مفتی عالم دین کی داڑھی نوچی گئی ہے۔ ترجمان پی ڈی ایم نے کہاکہ حملے کی ویڈیوز ثبوت کیلئے ہیں جو سوشل میڈیا پر وائرل ہوچکی ہیں، حملہ اور تشدد گزشتہ رات کے احتجاجی مظاہرے میں شریک عمران ٹائیگر فورس کے غنڈوں نے کیا ہے۔ترجمان پی ڈی ایم نے کہاکہ پی ٹی آئی کے بدمعاشوں اور غنڈوں نے مسجد مدرسہ علمائ، تبلیغی جماعت اور طلباء کی بیحرمتی کی ہے۔ انہوںنے کہاکہ خیبرپختونخوا کے مختلف اضلاع سے ٹائیگر غنڈہ فورس کے ہاتھوں جے یوآئی کیکارکنوں پرتشددکی اطلاعات ہیں۔ ترجمان نے کہاکہ یہ بدمعاشی کے پی کے کی حکومت کی سرپرستی میں ہورہی ہے، کے پی کے انتظامیہ عمران نیازی ٹائیگرفورس کی غنڈہ گردی میں سہولت کار کا کردار ادا کررہی ہے۔ انہوںنے کہاکہ انتظامیہ تیمرگرہ میں مسجد پر حملے میں ملوث پی ٹی آئی کے بدمعاشوں اورغنڈوں کیخلاف کارروائی کرے بصورت دیگرحالات کی خرابی کی ذمہ داری مقامی انتظامیہ اورصوبائی حکومت پرہوگی۔ ترجمان حافظ حمد اللہ نے کہاکہ آئی جی پولیس اور چیف سیکرٹری کے پی کے فوری طور پر تمام پر تشدد واقعات کانوٹس لیں، پی ڈی ایم متحدہ اپوزیشن اور جے یوآئی تبدیلی کا کیڑا نکالنے میں حق بجانب ہونگی۔ ترجمان نے کہاکہ عمران نیازی کرسی کی ہوس میں ملک میں خانہ جنگی چاہتا ہے، پی ٹی آئی عمران نیازی کی کال پر احتجاج اپنی حکومت کے سوگ میں کر رہی ہے مگر حملے مساجد مدارس اور علماء پر ہورہے ہیں۔ ترجمان پی ڈی ایم نے کہاکہ یہ ہے ریاست مدینہ کے نمونے عمران نیازی تم اور تمہاری جماعت، پی ٹی آئی کا سربراہ اور یہ جماعت تاریخی فتنہ ہے۔
