اسلام آباد(نیوز ڈیسک)ڈائیٹنگ آپ کو خوشنما جسامت تو دے سکتی ہے تاہم اس امر کا خطرہ بھی موجود ہے کہ یہ آپ کو تحفے میں منہ کی بدبو بھی دے سکتی ہیں۔خاص کر وہ ورزشی منصوبے جن میں پروٹین کی مقدار بڑھا دی جاتی ہے اور کاربوہائیڈریٹس کی مقدار گھٹائی جاتی ہے، جسم کے اندر ایک خاص قسم کے عمل کا باعث بنتی ہے،اسے کیٹوسس کہتے ہیں۔یہ دراصل میٹابولزم کا ایک مرحلہ ہے جس میں جسم اپنی توانائی کی ضروریات پوری کرنے کیلئے خون میں بوجود کیٹون باڈیز کا سہارا لیتا ہے۔اسی کی وجہ سے منہ میں بدبو کا مسئلہ پیدا ہوتا ہے۔علاوہ ازیں اگر ڈائیٹنگ کیلئے ورزش کا منصوبہ بھی جاری ہے تو یہ بھی منہ کی بدبو کا سبب بن سکتا ہے کیونکہ ورزش سے جسم میں پانی کی کمی واقع ہوتی ہے۔اگر آپ پانی کی مقدار کو پورا رکھنے کی کوشش نہیں کریں گی تو ایسے میں منہ میں تھوک بننے کی مقدار کم ہوجائے گی۔یہ تھوک منہ کی بدبو ختم کرنے میں بے حد اہم ہوتا ہے۔اس کی وجہ سے منہ میں پلاک اور بیکٹریا بننے کا عمل تیز نہیں ہونے پاتا نیز یہ ان کا ہاتھ کے ہاتھ صفایا کرتا جاتا ہے۔جب تھوک نہیں بنتا ہے توپلاک اور بیکٹیریا پیدا ہونے کا عمل تیز ہوجاتا ہے اور یوں بھی منہ سے بدبو آتی ہے۔اس صورتحال کا یہ حل ہرگز نہیں ہے کہ بہتراور بدبو سے پاک سانس کے لئے ڈائیٹنگ چھوڑ دی جائے یا پھر منٹ والی چیونگم کھائی جائے۔ان اشیا میں موجود چینی منہ کی بدبو میں اضافہ کرے گی کیونکہ یہ بیکٹیریا کی افزائش کا عمل تیز کردے گی جبکہ شوگر فری گم پیٹ پھولنے کا باعث ہوسکتی ہیں۔