لاہور( این این آئی) چیئر پرسن قائمہ کمیٹی داخلہ و تحریک انصا ف پنجاب کی سیکرٹری اطلاعات مسرت جمشید چیمہ نے کہا ہے کہ اپوزیشن کا کرپشن اورلوٹ مار کی سرمایہ کاری سے تیار کیا گیا لانگ مارچ اورتحریک عدم اعتماد کا ڈرامہ چلنے سے پہلے ہی فلاپ ہو گیا ،

اگر ملک سے بھاگے ہوئے سزا یافتہ شخص نے وزیر اعظم اور وزیر اعلیٰ کا فیصلہ کرنا ہے تو (ن) لیگ کی سیاست پر انا للہ و انا الہ راجعون ہے ،آصف زرداری کے خانہ بدوشوں والے ڈیرے ان کے کسی کام نہیں آ سکیں گے۔ پارٹی کی سیکرٹری اطلاعات کا عہدہ ملنے پر مبارکباد دینے آنے والے رہنمائوں سے ملاقات کے موقع پر گفتگوکرتے ہوئے مسرت جمشید چیمہ نے کہا کہ چوروں کا ٹولہ عدم اعتماد لانے کی بڑھک لگا کر خود ہی مصیبت میں پڑ چکا ہے ، اپوزیشن والے ملک کو عدم استحکام سے دوچار کرنے کے لئے جس بھی دروازے پر گئے وہاں سے ان کا کشکول خالی ہی واپس لوٹا ہے ۔ انہوں نے کہا کہ سوال یہ ہے کہ اپوزیشن سے 2023ء تک اس لئے انتظار نہیں ہو رہاکیونکہ ان کی سیاست تنزلی کی دلدل میں دھنس چکی ہے ،یہ منفی سر گرمیوں کے ذریعے جتنا باہر آنے کی کوشش کریں گے اتنا ہی اندر دھنستے چلے جائیں گے۔ مسرت جمشید چیمہ نے کہا کہ تحریک انصاف اور اس کے اتحاد ی متحد ہیں اور ان شا اللہ حکومت پانچ سال کی مدت پوری کرے گی ،آئندہ عام انتخابات میں سندھ میں بھی کامیابی سے پیش قدمی کریں گے ۔